Ljósafell SU 70
Hér er Ljósafell í flotkvínni hjá Alkor í Gdansk tilbúið til sjósetningar, en skipið verður sjósett á morgun 2. nóvember.
Umhverfisverðlaun LÍÚ 2007
Á aðalfundi Landssambands ísl. útvegsmanna sem haldinn var á Hilton Hóteli í Reykjavík 25. og 26. október s.l. voru umhverfisverðlaun LÍÚ veitt í 9. sinn. Að þessu sinni hlaut Loðnuvinnslan hf á Fáskrúðsfirði verðlaunin. Einar K. Guðfinnsson, sjávarútvegsráðherra, afhenti Gísla Jónatanssyni, framkvæmdastjóra LVF., umhverfisverðlaunin 2007.
Verðlaunin voru glerlistaverk eftir Ingu Elínu Kristinsdóttur.
Síldveiðar 2007
Hoffell á síldveiðum inn á Grundarfirði 21. okt. 2007.
Ljósm. Guðmundur Smári Guðmundsson
Ljósafell sandblástur
Nú er búið að sandblása og grunna Ljósafellið að mestu leyti utandekks og útlit skipsins orðið verulega breytt eins og gefur að líta á meðfylgjandi mynd.
Ljósafell 7. vika
Í þessari viku var öxldráttur og yfirhalning á skrúfuhaus, stýri og stýrisstamma í gangi. Skipt var um skrúfublöð, og allt verkið tekið út og samþykkt af Lloyds. Ýmis búnaður var settur um borð í vikunni og er verið að koma fyrir, svo sem nýr spilrafall, skiljubúnaður fyrir skólp, ný ruslalúga á millidekk, fiskilúga komin eftir yfirhalningu. Seinnipart viku hefur rignt og það snjóaði á föstudegi, en á meðan var unnið að sandblæstri og málun á vatnstönkum. Járnavinna víða í gangi, verið að sjóða í skutrennu og í vasanum fyrir skutrennulokann, verið að sjóða upp nýja lensibrunna fyrir millidekk. Nýju togvindurnar komu til Gdansk í vikunni ásamt nýju hjálparvindunum og er þá mest af þeim búnaði sem fer um borð í Póllandi komið. Á myndinni að ofan getur að líta aðra nýju togvinduna frá Ibercisa.
Ljósafell 6. vika
Í þessari viku var byrjað á sandblæstri á skipinu. Búið er að sandblása fram á bakka, yfirbygging, trolldekk og í kringum vindur. Stýri tekið af og öxull og skrúfa tekin í land. Akkerum og keðjum slakað niður og þær lagðar út til hreinsunar og skoðunar. Búið að brenna burtu vasann fyrir skuthliðið og búið að smíða nýjan skutrennuloka. Suðuvinna er víða í gangi, spilundirstöður, styrkingar neðandekks undir spilum, nýja dekkhúsið, stigagangur til lestar ofl. Einnig er verið að gera við skemmdir á sb síðu efir núning við bryggju. Botnstykki Kajo-denki fjarlægt, og verið að útbúa festingar fyrir Simrad ES-60 dýptarmæli. Yfirhalning á grandara, gilsa og trixavindum er langt komin og líta þær þokkalega vel út að innan.
Ljósafell 5. vika
Ljósafell var tekið uppí flotkví á föstudegi 5. október. Byrjað var að þvo skipið með vatnsblæstri á botni og síðum og undirbúa skipið fyrir sandblástur. Skipt var um legur í AC rafal og hann hreinsaður. Byrjað að rífa í lest, spíralar, klæðningar og einangrun til að koma fyrir nýjum stigagangi og nýjum lensibrunnum fyrir millidekk. Freontankur fjarlægður úr lest. Byrjað að sjóða styrktarbönd undir togvindur, einnig byrjað að sjóða plötur í dekkhús fyrir nýju stakkageymsluna.
Síld og mjölafskipun
Hoffell kom í morgun til Fáskrúðsfjarðar með um 250 tonn af síld. Síldin verður flökuð og söltuð hjá LVF.
Þá er flutningaskipið Mangó að lesta 1500 tonn af fiskimjöli sem selt hefur verið til Danmerkur.
Fyrsta haustsíldin
Fyrsta síldin á þessu hausti barst til Fáskrúðsfjarðar í morgun. Það var Hoffell SU 80 sem kom með um 100 tonn. Síldin veiddist á Hvalbaksgrunni og var skipið 3 tíma í land. Síldin fer öll í flökun og söltun hjá Loðnuvinnslunni.
Ljósafell vika 4
Lokið var við að hreinsa burt restina af gömlu undirstöðunum fyrir togspilin. Tankahreinsun og þykktarmæling á olíutönkum lokið og kom hún vel út. Upptekt á rafalagír í gangi, sömuleiðis er verið að hreinsa og skipta um legur í AC rafal. Toggálgi skorinn af skipinu og farið með hann í land til viðgerða, svo og til að sjóða í hann nýtt stykki vegna hækkunar um 30 cm. Byrjað að þvo skipið uppá brú og fram á bakka með vatnsblæstri. Einnig unnið að því að verja kapla og búnað fyrir sandblástur. Fiskilúga tekin í land til viðgerða. Nýrri olíuskilvindu og smurolíuskilvindu ásamt dælum og hiturum komið fyrir og soðið niður á undirstöður. Ýmislegt af nýjum búnaði í skipið er að berast og á myndinni hér til hægri gefur að líta nýtt vakúm kerfi fyrir WC og frárennsli. Skipverjar ættu því að una vel á klósettinu fullvissir þess að „plopsið“ verður meðhöndlað samkvæmt nýjustu reglum EES.
Barcelona
Fimmtudagskvöldið 27. september n.k. flýgur 75 manna hópur starfsmanna LVF og maka frá Egilsstöðum í helgarferð til Barcelona. Það er Starfsmannafélag LVF sem annast hefur undirbúining ferðarinnar í samvinnu LVF. Farið verður í skoðunarferðir um svæðið og á knattspyrnukappleik og skemmtun haldin á laugardagskvöldinu. Ferðalangarnir halda svo heim á leið með flugi til Egilsstaða mánudaginn 1. október.
Ljósafell vika 3
Í þessari viku hefur ennþá verið að rífa ýmislegt frá og fóru togvindurnar í land í vikunni ásamt stórum hluta af undirstöðum þeirra. Afgasketill hífður í land til viðhalds, lághitakælir fjarlægður úr vélarrúmi, glussadæla ásamt mótor og tank fjarlægð úr skorsteinshúsi bb til að rýma fyrir nýrri stakkageymslu. Rifið innan úr fiskmóttöku svo hægt sé að klæða með rústfríu efni. Lestargöng á efra dekki skorin í burtu til að rýma fyrir nýjum sturtum og klósettum. Lestargöng á neðra dekki skorin í burtu til að rýmka fyrir stækkuðum borðsal. Gamli spilrafallinn rifinn í land í pörtum og verið að rýma leið fyrir þeim nýja niður í vélarrúm. Verið er að þykktarmæla skipið. Akkerisvinda og hjálparvindur eru komnar á verkstæði og er verið að sandblása þær og yfirfara. Á myndinni hér að ofan eru þeir starfsmenn sem sinna stjórnun og eftirliti með breytingunum á Ljósafellinu í Póllandi. Þeir eru frá vinstri: Kjartan Reynisson, útgerðarstjóri, Ryszard Zdunowski, pólskur eftirlitsmaður, Gunnar Óli Ólafsson, yfirvélstjóri og Ragnar Logi Björnsson, 1. vélstjóri