LVF óskar sjómönnum og fjölskyldum þeirra innilega til hamingju með daginn.

Í dag verður formlega til hin nýja FJARÐABYGGÐ og eru þar með sameinuð í eitt fjögur sveitarfélög, Austurbyggð, Fáskrúðsfjarðarhreppur, Fjarðabyggð og Mjóafjarðarhreppur.

Fjarðalisti og Framsóknarflokkur hafa myndað meirihluta í bæjarstjórn og verður Guðmundur R. Gíslason forseti bæjarstjórnar og Guðmundur Þorgrímsson formaður bæjarráðs. Fyrsti fundur nýkjörinnar bæjarstjórnar verður haldinn þriðjudaginn 13. júní kl. 14.00 að Sólbrekku í Mjóafirði.

Íbúum hinnar nýju Fjarðabyggðar er óskað til hamingju með daginn og árnað heilla í framtíðinni. LVF

Eiríkur Ólafsson hefur látið af störfum sem fulltrúi kaupfélagsstjóra KFFB og framkvæmdastjóra LVF eftir að hafa starfað hjá Kaupfélagi Fáskrúðsfirðinga og dótturfyrirtækjum þess bæði á sjó og í landi um 32ja ára skeið.

Stjórnir félaganna og framkvæmdastjóri þakka Eiríki mjög gott samstarf og fyrir mikinn dugnað í störfum sínum fyrir félögin. Eiríki er óskað velfarnaðar á nýjum starfsvettvangi.

Við starfi Eiríks hefur tekið Kjartan Reynisson sem starfað hefur hjá KFFB og dótturfyrirtækjum í 30 ár og þar af á skrifstofum félaganna frá 1981-2005. Kjartan er boðinn velkominn á ný til starfa hjá hjá félögunum.

Finnur fríði FD 86 landaði 3. júní 318 tonnum af norsk-íslenskri síld og í kvöld er svo von á Saksabergi FD 125 með um 300 tonn af síld. Síldin hefur veiðst innan íslensku landhelginnar norð-austur af landinu og hefur verið flökuð og söltuð hjá Loðnuvinnslunni h/f.

Í morgun kom færeyska skipið Finnur fríði FD 86 frá Götu til Fáskrúðsfjarðar með um 500 tonn af norsk-íslenskri síld. Löndun úr Finni hófst um hádegi, eftir að flutningaskipið Haukur hafði lestað 1200 tonn af fiskimjöli sem selt hefur verið til Noregs. Síldin verður unnin til manneldis og verður flökuð og söltuð.

Færeyska skipið Saksaberg FD 125 landaði um 275 tonnum af norsk-íslenskri síld á Fáskrúðsfirði s.l. laugardag. Síldin var flökuð og fryst hjá Loðnuvinnslunni h/f.

Tap af rekstri Loðnuvinnslunnar h/f á fyrsta ársfjórðungi 2006 nam kr. 71 millj. eftir skatta, samanborið við 90 millj. króna hagnað á fyrsta ársfjórðungi 2005 Tapið skýrist að verulegu leyti af neikvæðum fjármagnsliðum að fjárhæð kr. 224 millj. fyrst og fremst vegna lækkunar íslensku krónunnar, en fjármagnsliðir voru jákvæðir um kr. 32 millj. á þessum tíma árið áður. Þá tók félagið aðeins á móti 12 .þús. tonnum af loðnu í vetur miðað við 40 þús. tonn 2005.

Rekstrartekjur félagsins voru kr. 914 millj. og hækkuðu um 6% miðað við sama tíma árið 2005. Hagnaður fyrir afskriftir og fjármagnskostnað nam kr. 182 millj. eða 20% af tekjum og hækkaði um kr. 50 millj. frá fyrra ári. Veltufé frá rekstri var kr. 113 millj. eða 12% af tekjum og lækkaði um kr. 11 millj. frá fyrra ári. Afskriftir voru kr. 49 milljónir lækkuðu um 16%.

Eigið fé félagsins var í lok tímabilsins kr. 1.535 millj. sem er 43% af niðurstöðu efnahagsreiknings. Nettó skuldir Loðnuvinnslunnar voru kr. 1.227 millj. og höfðu hækkað um kr. 292 millj. einkum vegna kaupa félagsins á varanlegum aflaheimildum.

Eiríkur Ólafsson lætur af störfum hjá Kaupfélagi Fáskrúðsfirðinga og Loðnuvinnslunni h/f í lok maí n.k. Eiríkur hóf störf hjá Hraðfrystihúsi Fáskrúðsfjarðar h/f árið 1973 á vélaverkstæði. Hann var vélstjóri á Ljósafelli 1974-1981, en tók þá við starfi útgerðarstjóra. Árið 1994 var Eiríkur jafnframt ráðinn fulltrúi kaupfélagsstjóra og framkvæmdastjóra LVF. Eiríkur hóf eigin atvinnurekstur 1. apríl s.l., en hann hefur keypt Bílaverkstæði Borgþórs á Egilsstöðum, sem rekur einnig bílasölu og er m.a. með umboð fyrir Toyota á Austurlandi.

Við starfi Eiríks tekur Kjartan Reynisson sem starfað hefur hjá KFFB og dótturfyrirtækjum þess um 30 ára skeið og þar af á skrifstofum félaganna frá 1981-2005 er hann flutti til Akureyrar.

Aðalfundur Kaupfélags Fáskrúðsfirðinga var haldinn 31. mars s.l. Hagnaður félagsins skv. samstæðureikningi nam kr. 66 millj., sem skýrist af stærstum hluta af hagnaði af sölu hlutabréfa. Eigið fé félagsins í árslok nam kr. 1.439 millj. sem er 96% eiginfjárhlutfall. Aðal eign félagsins er liðlega 82% eignarhlutur í Loðnuvinnslunni h/f.

Félagsmenn KFFB voru 178 í árslok.

Hagnaður Loðnuvinnslunnar h/f á Fáskrúðsfirði árið 2005 nam kr. 44 millj. eftir skatta, en var kr. 80 millj. árið 2004.

Rekstrartekjur félagsins að frádregnum eigin afla voru kr. 2.263 millj. og hækkuðu um 1,4% miðað við árið á undan. Rekstrargjöld voru kr. 2.017 millj. og hagnaður án afskrifta og fjármagnskostnaðar kr. 246 millj. eða 10,9% af tekjum og hækkaði um kr. 29 millj. frá fyrra ári. Veltufé frá rekstri nam kr. 180 millj. eða 8% af tekjum og er það sama fjárhæð og hlutfall og árið 2004. Afskriftir voru kr. 193 millj. og hækkuðu um 1,3% frá fyrra ári.

Eigið fé félagsins í árslok var kr. 1.642 millj. sem er 50,5% af niðurstöðu efnahagsreiknings. Arðsemi eiginfjár var 2,7%, en var 5,1% árið áður.

Nettó skuldir voru kr. 1130 millj. og hækkuðu um kr. 86 millj. frá árinu 2004.

Loðnuvinnslan fjárfesti fyrir kr. 392 millj. á árinu 2005 og þar af voru varanlegar aflaheimildir kr. 285 millj.

Á launaskrá komu 357 manns á síðasta ári, en að jafnaði unnu um 160 starfsmenn hjá félaginu.

Hluthafar voru í árslok 219. Stærsti hluthafinn er Kaupfélag Fáskrúðsfirðinga með liðlega 82% eignarhlut.

Aðalfundur Loðnuvinnslunnar var haldinn 31. mars s.l. og samþykkti fundurinn að greiða 5% arð til hluthafa eða kr. 35 millj.

Aðalfundur Kaupfélags Fáskrúðsfirðinga verður haldinn í Félagsheimilinu Skrúði föstudaginn 31. mars n.k. kl. 17.30.

Aðalfundur Loðnuvinnslunnar h/f verður haldinn í Félagsheimilinu Skrúði föstudaginn 31. mars n.k. kl. 18.30.

Sameiginlegur kvöldverður verður að loknum aðalfundunum.