Eiríkur Ólafsson lætur af störfum hjá Kaupfélagi Fáskrúðsfirðinga og Loðnuvinnslunni h/f í lok maí n.k. Eiríkur hóf störf hjá Hraðfrystihúsi Fáskrúðsfjarðar h/f árið 1973 á vélaverkstæði. Hann var vélstjóri á Ljósafelli 1974-1981, en tók þá við starfi útgerðarstjóra. Árið 1994 var Eiríkur jafnframt ráðinn fulltrúi kaupfélagsstjóra og framkvæmdastjóra LVF. Eiríkur hóf eigin atvinnurekstur 1. apríl s.l., en hann hefur keypt Bílaverkstæði Borgþórs á Egilsstöðum, sem rekur einnig bílasölu og er m.a. með umboð fyrir Toyota á Austurlandi.

Við starfi Eiríks tekur Kjartan Reynisson sem starfað hefur hjá KFFB og dótturfyrirtækjum þess um 30 ára skeið og þar af á skrifstofum félaganna frá 1981-2005 er hann flutti til Akureyrar.

Aðalfundur Kaupfélags Fáskrúðsfirðinga var haldinn 31. mars s.l. Hagnaður félagsins skv. samstæðureikningi nam kr. 66 millj., sem skýrist af stærstum hluta af hagnaði af sölu hlutabréfa. Eigið fé félagsins í árslok nam kr. 1.439 millj. sem er 96% eiginfjárhlutfall. Aðal eign félagsins er liðlega 82% eignarhlutur í Loðnuvinnslunni h/f.

Félagsmenn KFFB voru 178 í árslok.

Hagnaður Loðnuvinnslunnar h/f á Fáskrúðsfirði árið 2005 nam kr. 44 millj. eftir skatta, en var kr. 80 millj. árið 2004.

Rekstrartekjur félagsins að frádregnum eigin afla voru kr. 2.263 millj. og hækkuðu um 1,4% miðað við árið á undan. Rekstrargjöld voru kr. 2.017 millj. og hagnaður án afskrifta og fjármagnskostnaðar kr. 246 millj. eða 10,9% af tekjum og hækkaði um kr. 29 millj. frá fyrra ári. Veltufé frá rekstri nam kr. 180 millj. eða 8% af tekjum og er það sama fjárhæð og hlutfall og árið 2004. Afskriftir voru kr. 193 millj. og hækkuðu um 1,3% frá fyrra ári.

Eigið fé félagsins í árslok var kr. 1.642 millj. sem er 50,5% af niðurstöðu efnahagsreiknings. Arðsemi eiginfjár var 2,7%, en var 5,1% árið áður.

Nettó skuldir voru kr. 1130 millj. og hækkuðu um kr. 86 millj. frá árinu 2004.

Loðnuvinnslan fjárfesti fyrir kr. 392 millj. á árinu 2005 og þar af voru varanlegar aflaheimildir kr. 285 millj.

Á launaskrá komu 357 manns á síðasta ári, en að jafnaði unnu um 160 starfsmenn hjá félaginu.

Hluthafar voru í árslok 219. Stærsti hluthafinn er Kaupfélag Fáskrúðsfirðinga með liðlega 82% eignarhlut.

Aðalfundur Loðnuvinnslunnar var haldinn 31. mars s.l. og samþykkti fundurinn að greiða 5% arð til hluthafa eða kr. 35 millj.

Aðalfundur Kaupfélags Fáskrúðsfirðinga verður haldinn í Félagsheimilinu Skrúði föstudaginn 31. mars n.k. kl. 17.30.

Aðalfundur Loðnuvinnslunnar h/f verður haldinn í Félagsheimilinu Skrúði föstudaginn 31. mars n.k. kl. 18.30.

Sameiginlegur kvöldverður verður að loknum aðalfundunum.

19. mars. Þeir hafa verið drjúgir bátarnir frá Götu í Færeyjum að landa á Fáskrúðsfirði í vetur. Enn bætist við því Tróndur í Götu byrjaði að landa í kvöld 2500 tonnum af kolmunna sem hann veiddi á Rockall svæðinu.

Danski báturinn Beinur frá Hirtshals er að landa 1300 tonnum af kolmunna sem fékkst vestur af Rockall. Samtals er búið að taka á móti u.þ.b. 17.200 tonnum af kolmunna á þessu ári.

Færeyska skipið Júpiter frá Götu kom til Fáskrúðsfjarðar í morgun með um 2000 tonn af kolmunna. Aflinn fékkst suð-vestur af Rockall og var um 580 sjómílna sigling til Fáskrúðsfjarðar.

Skoska kolmunnaskipið Taits kom í gærkvöldi til Fáskrúðsfjarðar með um 1300 tonn af kolmunna af miðunum við Rockall, en áður hafði Taits landað 26. febrúar s.l.

Írska skipið Atlantean frá Killybegs kom til Fáskrúðsfjarðar í fyrra kvöld með um 1200 tonn af kolmunna sem skipið veiddi vestur af Írlandi og var um 650 sjómílna sigling til Fáskrúðsfjarðar. Skipið tengist Fáskúðsfirði á þann hátt að LVF keypti 1998 eldri Atlantean frá þessu sama fyrirtæki sem nú heitir Hoffell.

Færeyska skipið Saksaberg kom til Fáskrúðsfjarðar í morgun með um 800 tonn af loðnu sem veiddist á loðnumiðunum út af Faxaflóa og var um 34 klst. sigling af miðunum. Kreist verða hrogn úr farminum sem fara til frystingar hjá LVF.

Hoffell kom í dag til heimahafnar með um 1300 tonn af kolmunna, sem skipið aflaði á alþjóðasvæðinu suðvestur af Rockall.