Í dag kom flutningaskipið Sun Rio með nýjan gufuþurrkara frá Haarslev í Danmörku í fiskmjölsverksmiðjuna. Í staðinn fóru út tveir rúmlega 40 ára gamlir þurrkarar og um borð í sama skip, sem flytur þá til Marocco í Afríku. Nýji þurrkarinn er um rúmlega 100 tonn að þyngd og hífðu þrír kranar hann upp úr skipinu á frystiklefabryggjuna. Nýji þurrkarinn er um 70% stærri en hinir tveir og eykst þurrkgeta  í verksmiðjunni um 15% við þessar breytingar.  Reiknað er með að nýji þurrkarinn verði tekinn í notkun eftir um 3 vikur.  

Undanfarnar sex vikur hefur Hoffellið verið í slipp í Þórshöfn í Færeyjum. Stærsta verkefnið var að skipta um kælikerfi, en undirbúningsvinna fyrir þau skipti hafði verið framkvæmd í áföngum. Þá var gírinn fyrir aðalvélina einnig yfirfarinn og ljósavélin tekin upp. Kjartan Reynisson útgerðarstjóri sagði að allt hefði gengið nokkurn vegin samkvæmt áætlun og verkin væru vel unninn líkt og áður hjá frændum vorum í Færeyjum.  Þá var gert við smáræði hér og þar, málað og snyrt. “Þetta var góð yfirhalning” sagði Kjartan og bætti því við að fyrirbyggjandi viðhald væri ávalt farsælast.

Skip Loðnuvinnslunnar fara að jafnaði í slipp annað hver ár, þar sem þau eru botnhreinsuð og máluð auk venjubundins viðhalds. En þegar mikið þarf að gera líkt og að skipta út kælikerfi þarf að fara oftar, það liggur í hlutarins eðli.

Nú er Hoffellið lagt af stað á miðin og mun þessi túr segja til um gæði nýja kælikerfisins en það á að geta kælt hraðar og betur en það sem fyrir var.

Ávalt hefur verið metnaður hjá LVF að hafa skip, báta, vélar og tæki í fullkomnu ástandi þannig að öryggi þeirra sem starfa sé ávalt eins og best verður á kosið. Og þá geta Hoffellsmenn raulað við störf sín: “stolt siglir fleygið mitt”.

BÓA

Það er dýrmætt þegar lífið getur gengið sinn vanagang. Ef síðustu misseri hafa kennt okkur eitthvað þá er það einmitt það. Á Sandfellinu sækja menn sjóinn rétt eins og þeir hafa gert til margra ára og það hefur gengið vel. 2000 tonn af afla kominn á land að verðmæti 500 milljóna króna! Hefð hefur skapast hjá Loðnuvinnslunni að færa áhöfnum, og öðrum starfsmönnum, köku til að fagna áföngum sem þessum. Áhöfnin á Sandfelli fékk sína köku. Rafn Arnarson skipstjóri á Sandfelli var að vonum sáttur og glaður með viðurkenninguna og kökuna. “Ég var bara einn um borð þegar kakan kom, strákarnir voru að sinna verkefnum annars staðar og ég þurfti að taka mig á að geyma kökuna þangað til þeir komu til baka” sagði þessi glaðlegi skipstjóri og bætti því við að kakan hefði verið afar góð.

En hverju skal þakka gæfuna og gengið? “Það eru margir samhangandi þættir” svaraði Rafn, “margir túrar, frábær beita, góðar áhafnir, svo eitthvað sé nefnt” bætti hann við.

Á Sandfelli eru tvær fjögurra manna áhafnir sem vinna tvær vikur í senn.

Þegar greinarhöfundur spjallaði við Rafn var Sandfell í landi á Neskaupsstað til að sinna viðhaldi á ískrapavél, stefnt á að fara til veiða þegar því yrði lokið.  Rafn gerði ráð fyrir því að þeir myndu leggja utan við Norðfjörð en sagði að væntanlega styttist í að þeir flyttu sig svolítið suður á bóginn. Fiskurinn stjórnar för.

BÓA

“Sæmd er hverri þjóð að eiga sægarpa enn” segir í ljóði Ólínu Andrésdóttur og þrátt fyrir að það ljóð sé samið á síðustu öld eiga þessi ljóðmæli enn vel við.

Áhöfnin á línubátnum Hafrafelli er skipuð sægörpum sem hafa dregið úr sjó afla að verðmæti 400 milljóna króna á árinu. 1.600 tonn af fiski. Loðnuvinnslan færði þeim köku að þessu tilefni og kunni áhöfnin vel að meta það.

Andrés Pétursson er skipstjóri á Hafrafelli og þegar hann var inntur eftir því hverju hann þakkaði þennan góða árangur svaraði hann að áhöfnin væri afbragðs góð og útgerðin væri flott. “Maður gerir ekkert einn” sagði Andrés.

Þegar greinarhöfundur náði símasambandi við Andrés hafði áhöfnin rétt lokið við að leggja línu og ætluðu að fara í kaffi og njóta þess að borða það sem eftir var af kökunni góðu. “Það var æðslegt að fá kökuna, hún er mjög góð og svo er alltaf gaman að fá viðurkenningu á vel unnu starfi” sagði skipstjórinn.

Á Hafrafelli eru tvær fjögurra manna áhafnir sem vinna tvær vikur í senn. Sækja þá stíft sjóinn og þegar það verða áhafnaskipti eiga menn frí í tvær vikur.

Áhafnarmeðlimum á Hafrafelli eru færðar hamingjuóskir með góðan árangur og þeim fylgja áframhaldandi óskir um gott gengi og gæfu.

BÓA

Hjá öflugu sjávarútvegsfyrirtæki þarf stöðugt að vera að bæta og breyta. Tækninni fleygir fram og stjórnendur Loðnuvinnslunnar hafa metnað til þess að fylgja tækninni og laga starfsemi fyrirtækisins að nútímanum eftir því sem efni, aðstæður og kostur leyfir.

Í bræðslunni standa yfir framkvæmdir sem lúta að því að skipta út svokölluðum þurrkurum, þ.e firna stórir tankar sem hafa það hlutverk að þurrka mjöl.  Í bræðslunni voru tveir gamlir þurrkarar sem keyptir voru notaðir þar inn þegar bræðslan tók til starfa árið 1996, þannig að aldur þeirra í dag er orðinn býsna hár eða rúmlega 40 ár.  Þurrkflötur gömlu þurrkarana var samanlagt 400 m2.  Nýr þurrkari er á leiðinni með skipi yfir hafið og er hann væntanlegur á næstu dögum. Hefur hann þurrkflöt uppá 690m2, sem er umtalsvert meira en þessir tveir sem hann leysir af hólmi, og hann vegur 100 tonn!

Magnús Ásgrímsson er verksmiðjustjóri í bræðslunni og aðspurður svaraði hann því til að ástæða þess að ráðist var í þessa framkvæmd væri sú að gömlu þurrkararnir þyrftu orðið nokkuð mikið viðhald en sá nýji gæfi möguleika á auknum afköstum auk þess sem honum fylgdi aukið rekstraröryggi. “Svo er þetta enn eitt skrefið í að bæta starfsemi bræðslunnar” sagði Magnús.  Gömlu þurrkararnir eru þó ekki komnir á eftirlaun, því þeir hafa verið seldir og þeirra bíða ný verkefni annars staðar.

Þá er verið að byggja mjölskemmu við austurgafl bræðslunnar. 700m2 hús sem tekur rúmlega 2.000 tonn af mjöli í pokum. Grunnur og gólf er steypt og síðan kemur reisulegt  stálgrindarhús þar ofaná þar sem lofthæðin er 10 metrar uppí mæni. Tilgangurinn með svo mikilli lofthæð er sá að þá er hægt að stafla mjölpokunum hverjum ofan á annan og á þann máta nýtist húsið vel.  Magnús sagði að hús af þessu tagi væri kærkomið því oft þarf að koma miklu magni af mjöli í geymslu áður en það er sent um heimsbyggðina til þeirra sem það kaupa.

BÓA

Wilson Clyde er að lesta mjöl í dag samtals 1.260 tonn, mjölið fer til Noregs.

Þegar búið er að lesta þetta er næstum allt mjöl selt hjá LVF.