Sagt er að besta gjöfin sé sú sem heldur áfram að gefa.  Þannig er því varið með þá styrki sem Loðnuvinnslan veitti á aðalfundi sínum föstudaginn 2.júlí 2021.  Á fundinum voru afhentir styrkir fyrir samtals 24.5 milljónir króna. 

Knattspyrnudeild Leiknis fékk 11 milljónir í styrk.  Er þeim peningum varið til að efla og styrkja knattspyrnuiðkun karla, kvenna og kátra krakka. Magnús Ásgrímsson er formaður knattspyrnudeildar og sagði hann styrkinn vera ómetanlegan í rekstri deildarinnar og sagði LVF vera sterkan og traustan bakhjarl.

Starfsmannafélag Loðnuvinnslunnar fékk 7 milljón króna styrkt til sinnar starfsemi. Alberta Eide Guðjónsdóttir er formaður starfsmannafélagsins og var hún afar þakklát fyrir framlagið fyrir hönd félagsmanna sinna. Hún sagði að peningunum yrði varið í að efla félagslífið með einhverjum hætti.  Þá sagði Alberta að í umræðunni væri að fara í utanlandsferð á vori komandi, en slíkar ferðir hafa verið nokkuð reglulegar á vegum starfsmannafélagsins og ávalt verið hin besta skemmtun.

Þá fékk Björgunarsveitin Geisli 5 milljón króna styrk sem varið verður til kaupa á nýjum björgunarbát.  Grétar Helgi Geirsson er formaður Geisla og sagði hann styrkinn gríðarlega góðan.  “Endurnýjun á björgunarbátnum Hafdísi var á 15 ára plani, en aðstæður og samstarf við Rafnar, fyrirtækið sem hannar og smíðar björgunarbáta eins og Hafdísi, gerði það að verkum að tækifæri til að fá nýjan, stærri og betri bát bauðst á þessum tímapunkti” sagði Grétar. Hann bætti því líka við það hefði ekki verið möguleiki fyrir Geisla að fara út í þessi bátaskipti án þessa góða stuðnings sem björgunarsveitin fær frá LVF .  “Það er ómetanlegt hvernig Loðnuvinnslan hefur alltaf hlaupið undir bagga í okkar starfsemi” sagði Grétar.

Bæjarhátíðin Franskir dagar fengu 1,5 milljónir króna. Síðustu helgina í júlí verða Franskir dagar haldnir hátíðlegir á Fáskrúðsfirði í 25 skiptið. Að halda veglega bæjarhátíð með metnaðarfullri dagskrá kostar peninga og þá skiptir máli að eiga góða að. María Ósk Óskarsdóttir Snædal er gjaldkeri félagsins um Franska daga.  Sagði María að styrkirnir sem berast annars vegar frá Loðnuvinnslunni og hins vegar frá Kaupfélaginu væru mjög mikilvægir. “Að fá þessa styrki munar öllu fyrir okkur” sagði María og bætti því við að þetta væru lang rausnarlegustu styrkirnir sem bæjarhátíðin fengi og sagði svo “þetta væri bara ekki hægt án þessara styrkja”.  Áhersla verður lögð á vandaða dagskrá fyrir börn að þessu sinni og reynt eftir fremsta megni að gera það með þeim hætti að það verði ókeypis fyrir börnin að taka þátt. 

Sjá má á þessum styrkveitingum að margir njóta góðs af og gjafirnar halda áfram að gefa.

BÓA

Á aðalfundi Kaupfélags Fáskrúðsfirðinga föstudaginn 2.júlí 2021 veitti félagið styrki að upphæð 4,65 milljónir króna.

Hollvinasamtök Skrúðs fengu 1 milljón króna. Smári Júlíusson er formaður Hollvinasamtakanna og sagði að styrkurinn væri afar vel þeginn.  “Hollvinasamtökin hafa verið svo lánsöm að fá styrki frá Kaupfélaginu, á síðast liðnum árum, til endurbóta á félagsheimilinu Skrúði” sagði Smári.  Félagsheimilið hefur verið málað, snyrt og endurbætt á margan máta fyrir styrkféð og þar sem Hollvinasamtökin hafa litla sem enga möguleika á að afla fjár í því magni sem þarf til að endurbæta og viðhalda húsi af  þeirri stærðargráðu sem Skrúður er,  er styrkurinn algerlega ómetanlegur. Við kunnum Kaupfélaginu bestu þakkir fyrir sagði Smári.

Blakdeild Leiknis fékk 1,5 milljónir króna.  Elsa Sigrún Elísdóttir er formaður blakdeildarinnar og aðspurð sagði hún peningana munu fara að miklu leiti í krakkablakið. Börn borga engin æfingagjöld hjá blakdeildinni en þjálfari þarf að fá umbun fyrir sitt starf líkt og aðrir þannig að hluti af fénu fer í það.  “Svo fer drjúgur hluti í að endurnýja búnað” sagði Elsa Sigrún, “það þarf nýja bolta annað dót sem við þurfum til æfinga” bætti hún við.  Elsa sagði  stjórnendur blakdeildarinnar afar þakklát fyrir stuðninginn og með honum kæmist blakdeildin hjá klandri, eins og formaðurinn orðaði svo skemmtilega.

Félag um Franska daga fékk 1,5 milljónir króna frá Kaupfélaginu.  Bæjarhátíðin Franskir dagar heldur upp á 25 ára afmæli síðustu helgina í júlí. Á dagskránni verður eitthvað fyrir alla en aðal áhersla verður lögð á skemmtilegheit fyrir börnin.  María Ósk Óskarsdóttir Snædal er gjaldkeri  félags um Franska daga og þakkar rausnarlegan stuðning Kaupfélagsins í gegn um árin.

Þá fengu blak- og knattspyrnudeild Leiknis búnað, að verðmæti 650 þúsund króna, til þess að streyma leikjum. Um er að ræða mynadvél og hljóðnema sem nota skal til þess að sýna, og lýsa með orðum, leikjum deildanna í beinu streymi. Þannig geta fjarstaddir horft á Leiknisliðin etja kappi við andstæðinga hvar svo sem menn eru niður komnir.   Eru stjórnendur blak- og knattspyrnudeildar sannfærð um að þetta muni gleðja marga og gefa þeim sem ekki eiga heimangengt tækifæri til að fylgjast með. Kunna þau Kaupfélaginu allra bestu þakkir fyrir góða gjöf.

Björgunarbátasjóður Austurlands fékk 500 þúsund krónur til kaupa á björgunarbátnum Hafbjörgu.  Björgunarbátasjóður Austurlands er félag sem heldur utan um rekstur björgunarbáts sem er að hluta til í eigu sjóðsins og að hluta í eigu Landsbjargar. Hafbjörg á heimahöfn í Neskaupstað.  

Einar Hálfdánarson sagði styrk sem þennan hafa mikla þýðingu fyrir verkefnið. “Við sinnum hafsvæðinu frá Papey að Héraðflóa og erum gjarnan á sjó við erfiðar aðstæður og því skiptir máli að hafa góðan bát” sagði Einar og þakkar fyrir hönd Björgunarbátasjóðsins.

Skrifað stendur “sælla er að gefa en að þiggja” en á þessu bjarta sumarkvöldi er Kaupfélag Fáskrúðsfirðinga deildi út styrkjum var ekki síður sælt að þiggja þvi að allur fer peningurinn í starf í þágu samfélagsins með einum eða öðrum hætti.

BÓA