Dagana 25. til 29.nóvember s.l. fór starfsmannafélag Loðnuvinnslunnar til Glasgow í Skotlandi.

Flogið var frá Egilsstöðum og hópurinn sem fór á vegum LVF taldi 76 manns.  Flug á milli austur strandar Íslands og  Skotlands  þykir nokkuð stutt eða tæpar tvær klukkustundir og voru ferðalangar sammála um að flugferðin hefði verið þægileg og þjónustan um borð verið til fyrirmyndar. Margir voru búnir að kynna sér hvað hægt var að gera í borginni, hvaða söfn og sýningar þar væru að finna en aðrir kusu að láta kylfu ráða kasti hvernig dögunum skyldi varið.

Veðrið var með ágætum, smá skúrir af og til fyrstu dagana en síðan brosti sólin á móti fólki.

Una Sigríður Jónsdóttir er starfsmaður LVF og var hún ein af þeim sem fóru í ferðina til Glasgow. Hún sagði að ferðin hefði verið æðisleg, hópurinn frábær og hótelið alveg framúrskarandi. “Þetta var bara í alla staði frábær ferð”, sagði Una   “góðir veitingastaðir þar sem hægt var að borða mikið af góðum mat og enn betri drykkir” bætti hún við kímin.

Una sagði borgina vera að jafna sig eftir erfið Covid ár, líkt og aðrar borgir heimsins, en jólaljósin hefðu verið falleg og fólkið sem mætti þeim í allri þjónustu verið afar indælt og elskulegt og svo var þar afar skemmtilegur jólamarkaður þar sem gaman var að ganga um og skoða.

“Svo eru búðirnar flottar og við vinkonurnar gátum alveg rölt aðeins um þær” sagði Una og ekki laust við að sæluandvarp slyppi af vörum hennar við upprifjunina.  Hún sagði frá því að einn daginn hefði hún gengið rúmlega 21 þúsund skref og henni hefði verið góðlátlega strítt á því að hún hefði nú að öllum líkindum ekki farið svo langt, hún væri jú bara svo smávaxin og tæki þar af leiðandi svo smá skref.  Hún sagði líka að það hefði verið alger snilld að heimsmeistarmótið í knattspyrnu skyldi vera í gangi því margir makar kusu heldur að sitja á kránni og horfa á spennandi fótbolta og á meðan hinn makinn lét greipar sópa í verslunum. Allir ánægðir.

Aðspurð að því hvort að hún hefði tekið sér eitthvað sérstakt fyrir hendur á meðan á dvölinni í Glasgow stóð sagði hún að hún og vinahópur hefðu farið í minigolf á mjög svo sérstakan stað. “Það var líkt og að ganga inn í listaverk, þar sem hver braut bar ákveðið þema úr þekktri bíómynd, og svo fórum við á karioki bar þar sem ákveðnir aðilar úr hópnum slóu í gegn með Lady Gaga laginu Shallow” rifjaði Una upp.

Steinþór Pétursson skrifstofustjóri hjá Loðnuvinnslunni var afar sáttur við Glasgow ferðina. “Þetta var fín ferð” sagði Steinþór “súper staðsetning á hótelinu þar sem aðeins steinsnar var á verslunargötuna fyrir þá sem það kusu og eins steinsnar frá járnbrautastöðinni fyrir þá sem kusu að fara lengra til”.  Sem Steinþór gerði ásamt góðum hópi ferðafélaga. Þau tóku lestina yfir til Edinborgar og eyddu þar dagparti við að ganga um götur, kíkja á jólamarkað og auðvitað að njóta veitinga eins og hefð er fyrir í slíkum ferðum.  Steinþór sagðist hafa gengið nokkuð um borgina til þess að skoða sig um “ég fékk mér gjarnan göngu þegar frúin kíkti í búðirnar” sagði Steinþór og bætti því við að stöku sinnum hefði hann nú staldrað við til að væta kverkarnar og kíkt þá á fótboltann í leiðinni væri hann á skjá hvort sem var.  Steinþór hafði líka orð á því hversu frábært það væri að geta flogið svona á vit ævintýra út í hinn stóra heim frá heimahögum, “þvílík þægindi að lenda og vera kominn heim eftir klukkustund” sagði hann.

Á laugardagskvöldinu bauð Loðnuvinnslan öllum í þriggja rétta máltíð á veitingastað í nágrenni hótelsins sem þau gistu. Una og Steinþór voru sammála um að maturinn hefði verið stórkostlega góður og kvöldið allt hið eftirminnilegasta.

Heyra mátti glögglega á þeim báðum að nú væri bara að bíða næstu ferðar á vegum starfsmannafélagsins því hvað er betra í þessum heimi en að njóta samvista og lífsins lystisemda með góðu samferðafólki.

BÓA

Sandfell með 190 tonn í 14 róðrum og Hafrafell með 184 tonn í 15 róðrum.

Mynd: Þorgeir Baldursson.

Mynd: Þorgeir Baldursson.

Hoffell hefur verið í Færeyjum í sl. 6 vikur vegna breytinga.  Nótakassinn var stækkaður úr 130 m3 í 180 m3 og settur nýr nótakrani á skipið frá Triplex í Noregi.  Spilmótorar á aðalspili voru teknir upp, glussalagnir lagðar fyrir nýtt hjálparspil á framdekki.  Síðan voru ýmis smærri verk unnin.

Hoffell fór frá Færeyjum sl. sunnudagskvöld og fór beint á síldarmiðin vestur af landinu og kemur þangað í kvöld.  Síldin sem veiðist verður verkuð í salt eins og venjulega hjá Loðnuvinnslunni.

Nýr og breyttur nótakassi og nýr nótakrani frá Triplex.

Mynd: Kjartan Reynisson.

Hoffell eftir breytingar í Þórshöfn í Færeyjum,  nótakassinn hefur verið hækkaður en hann var stækkaður um 40%. Í baksýn sést eldra Hoffell með fullfermi af NVG-síld og bíður eftir löndun.

Mynd: Kjartan Reynisson.

Breytingar voru gerðar á yfirbyggðu dekki og hægt að ganga þaðan yfir í framskipið.

Mynd: Kjartan Reynisson.

Nýr gufuþurrkari í verksmiðjuna er að verða tilbúinn út í Danmörku.  Hann hann verður afhentur 5. desember n.k.

Þurrkarinn og gírinn eru um 114 tonn.  Er þetta þriðji þurrkarinn sem Loðnuvinnslan kaupir á 7 árum. 

Þá er búið að leggja af alla 4 þurrkaranna sem settir voru upp í verksmiðjunni upphafalega og þessir þrír eru með 30 % meiri afköst eldri þurrkarar.

Mynd: Friðrik Mar Guðmundsson. Gufuþurrkarinn.

Mynd: Friðrik Mar Guðmundsson. Rótorinn á þurrkaranum.

Samkvæmt aflafréttum þá endaði Ljósafell í 4 sæti af togurum í október. Virkilega vel gert.

Hér má sjá lokalista hjá aflafréttum.

Frábær afli hjá Sandfelli og Hafrafelli í október og fengu samtals 532 tonn. Sandfell með samtals 283 tonn og Hafrafell með samtals 249 tonn.

Mynd: Þorgeir Baldursson.

Búið er að bæta til muna allt öryggi á hafnarsvæði Loðnuvinnslunnar.  Hófst sú vinna s.l vor undir stjórn öryggisstjóra LVF, Arnfríðar Eide, sem ásamt öryggisnefnd og stjórnendum gerðu ítarlega greiningu á hvar fyrirtækið gæti gert betur á þessu sviði. 

Víðsvegar hafa verið settir upp umferðarspeglar, annars vegar þar sem blint var fyrir ökumenn og hins vegar á staði þar sem bílstjórar fá betri sýn við að bakka að byggingum þegar verið er að ferma og afferma. Mikið af yfirborðsmerkingum voru settar upp líkt og gangbrautir og gönguleiðir. Þá voru bílastæðin skilgreind betur sem og stopp merkingar. Einnig hafa varúðarskilti verið sett upp við hafnarsvæðið þar sem skírt er kveðið á um að óviðkomandi sé bannaður aðgangur. Eru þau aðvörunarorð höfð bæði á íslensku og ensku.

Fast við hafnarsvæði Loðnuvinnslunnar stendur Fosshótel Austfirðir og þeir ferðalangar sem gista það glæsilega hótel hafa verið gjarnir á að fá sér göngu á hafnarsvæðinu, enda margt forvitnilegt fyrir ókunnuga að sjá, um leið og menn gera sér ekki grein fyrir hættunum sem þar kunna að leynast.  Nú þegar merkingar hafa verið settar upp láta gestir, sem og heimamenn, sér nægja að horfa yfir svæðið.  Þá hefur óþarfa bílaumferð um svæðið nánast horfið. Allt vísbendingar um að fólk virðir merkingarnar og er það vel.

Starfsfólk er mjög ánægt með þessa vinnu og finnur árangurinn í vinnu sinni. Hægt er að aka lyfturum og öðrum tækjum um svæðið af meira öryggi. 

Við fögnum því mjög að fólk virði merkingarnar og biðlum áfram til allra að gera slíkt hið sama. Öll viljum við koma heil heim eftir vinnudaginn, hvort heldur er á líkama eða sál.

Það er einnig frábært hvað stjórnendur og starfsfólk er jákvætt fyrir þeim öryggisráðstöfunum sem gerðar eru en slíkt auðveldar öryggisstjóra og öryggisnefnd mikið við innleiðingu öryggisferla og skapar ekki síður góða öryggismenningu í fyrirtækinu til framtíðar.

Undanfarin ár hefur töluverð vinna farið í að auka öryggi starfsfólks með því að áhættugreina hverja deild ásamt því að áhættugreina einstakar vélar aukalega. Í kjölfarið hefur slysum farið fækkandi og síðast liðið ár voru aðeins minniháttar atvik sem komu upp. Við höfum átt góða samvinnu við Vinnueftirlitið um hvað við getum gert betur og stóðst Loðnuvinnslan ítarlega úttekt sem fór fram s.l vor.

Við höldum ótrauð áfram, við erum á tánum og viljum gera enn betur. Því þegar kemur að öryggismálum er vísan aldrei of oft kveðin.