Nú nálgast verklok óðum og hefur Alkor shipyard verið krafið um að standa við afhendingu á skipinu í dagslok föstudaginn 1. febrúar. Það má þó ekki mikið óvænt koma uppá í prófunum til að raska því. Í þessari viku voru framkvæmd álagspróf á nýja rafalnum og töflu og gekk það að óskum. Togvindur og nýju hjálparspilin látin snúast og leit það vel út. Spilin verða prófuð undir álagi með veiðarfærum á Íslandi. Skrúfugír, öxull og skrúfa látin snúast. Uppfærslugír og gamli rafall prófaðir eftir upptekt og komu minniháttar bilanir í ljós. Klæðningarvinnu á millidekki að mestu lokið,og gengið frá lýsingu þar og víðar. Gólfefni komin á borðsal og setustofu og er unnið að dúklagningu á göngum. Byrjað að koma fyrir húsgögnum í borðsal, skápum, hitaborði og fleiru. Einnig byrjað á þrifum í klefum, og áhöfn byrjuð að flytja varahluti og öryggisbúnað um borð sem var fjarlægður vegna sandblásturs og málningar. Skipið er nú búið að fá sitt rétta einkenni á skorsteinshúsið eins og má sjá á meðfylgjandi mynd.

Í þessari viku var lokið við að mála vélarrúm að mestu leyti, einnig er verið að mála lestargólf. Klæðningarvinna gengur þokkalega og er búið að klæða veggi að mestu á millidekki og byrjað á lofti. Nýtt rými fyrir ískrapavélina er einnig langt komið. Klæðningar eru að miklu leyti komnar í borðsal, eldhúsi, á göngum og í stakkageymslur. Eldhústækin voru flutt um borð í vikunni, en eftir á að festa þau niður og tengja. Prófanir halda áfram á lögnum og tækjum og er tæknimaður frá Naustmarine að yfirfara niðursetningu á togvindum og hjálparvindum frá Ibercisa. Sjá mynd af stjórnbúnaði fyrir vindur. Einnig hefur hann eftirlit með gangsetningu á rafal og töflum. Síðasta glussavindan er komin úr upptekt og var sett um borð, og er lagnavinna fyrir lágþrýstivindur langt komin. Aðalvél var ræst á laugardag, en hún hefur ekki verið keyrð síðan 31. ágúst í fyrra. Niigatan malaði eins og köttur, að sjálfsögðu !!!!

Í síðustu viku var verið að einangra loft og veggi á millidekki og leggja út leiðara til að festa klæðningar í lofti og veggjum. Lestarspíralar voru settir upp aftur þar sem þeir höfðu verið rifnir frá. Prófanir á lögnum og tækjum halda áfram og í vikunni var ketill og lagnir honum tengdar prófaðar. Einnig kom maður frá Westfalia til að annast gangsetningu og prófanir á nýju olíuskilvindunum og lögnum þeim tengdum. Tengivinna við afl og stýristrengi fyrir togvindur og spilmótora að mestu búin. Veggklæðningar í sturtum og klósettum að mestu búnar og búið að setja nýjar hurðir fyrir þessi rými. Á myndinni má sjá rafvirkja Alkor vinna við tengingar í töflu fyrir nýju pressuna fyrir matvælaklefana.

Færeyska flutningaskipið Havfrakt er að lesta 1240 tonn af fiskimjöli sem selt hefur verið til Þýskalands.

Hinn 12. des. s.l. lestaði tankskipið Anglo um 1.850 tonn af lýsi frá LVF sem flutt var til kaupanda í Noregi.

Þar sem vikan er aðeins hálfnuð er framgangur heldur styttri nú en oft áður í vikuskýrslu, en það kemur til af því að vélstjórar og útgerðarstjóri eru á heimleið á morgun 20. des. í jólafrí. Klæðningarvinnu er lokið í lest og einnig er búið að einangra lestina með því að dæla urethani bakvið klæðningar. Byrjað er að tengja nýjar viftur við loftræstistokka og ganga frá loftristum. Ein trixavinda og önnur gilsavindan voru settar um borð. Rafvirkjar vinna víða í skipinu og voru að setja upp nýja rafmagnstöflu fyrir eldhús og borðsal ásamt tengivinnu í vélarrúmi. Búið er að fjarlægja alla stillansa af skipinu, enda er málning og vinna utaná skipinu mjög langt komin.

Starfsmenn Loðnuvinnslunnar hf í Póllandi senda vinnufélögum, vinum og vandamönnum bestu jólakveðjur.

Lokið var við að skipta um gler í brúargluggum í vikunni, en einnig voru settar niður 3 grandaravindur og ein trixavinda. Aflstrengir fyrir togvindur voru dregnir í vikunni. Nýja ískrapavélin var sett um borð og er byrjað að leggja að henni. Klæðningarvinna í lest er langt komin og sömuleiðis klæðning í fiskmóttöku með rústfríju stáli. Búið er að leggja út prófílfestingar fyrir göngugrindur á millidekki, í kringum togvindur og frá pokavindum og aftur í skut. Eldri grindur og festingar eyðilögðust vegna frárifa og við sandblástur. Búið er að mála pokagálgann og setja kastara oþh. upp aftur eins og sést á meðfylgjandi mynd. Búið er að flotsteypa í flesta ganga og gólf og er byrjað á flísalögn á klósettum, en skipt er um öll klósettin, 10 talsins.

Þetta er vikan sem skipið átti að afhendast og endurbyggingu að ljúka, en það hefur ekki tekist og er Alkor shiprepairyard búið að boða tafir á afhendingu Ljósafellsins fram í miðjan janúar.

Í vikunni voru settar upp nýjar togblakkir á skipið af gerðinni Habru og eru þær framleiddar af Vélgæðum ehf á Fáskrúðsfirði. Búið er að skipta um gler í 18 af 23 gluggum í brúnni. Byrjað er að setja niður hjálparvindur eftir rækilega upptekt á þeim. Á myndinni má sjá fyrstu grandaravinduna setta á sinn stað. Einangrun og klæðningarvinna er komin af stað og er verið að ganga frá þar sem hefur þurft að rífa frá vegna lagna eða suðuvinnu. Nýja loftræstikerfinu var komið fyrir um borð. Lagnavinna er í fullum gangi og er búið að lekaprófa sjókælilagnir í vélarrúm, en einnig eru kyndilagnir, vatnslagnir, skólp og klóaklagnir langt komnar.

Lokið var við sandblástur á Ljósafellinu í vikunni með því að pokagálginn og afturskipið voru blásin. Búið er að mála svæðið með tveim umferðum af grunn, en yfirmálun eftir. Í vikunni var einnig byrjað að leggja lagnir fyrir nýtt og umhverfisvænt slökkvikerfi vélarrúms. Kerfið heitir Novec 1230 og má sjá flöskurnar á meðfylgjandi mynd. Það mun leysa af hólmi Halon kerfi sem var ósóneyðandi og komið á bannlista yfir leyfileg slökkviefni. Í vikunni voru settar upp neyðarlúgur á þrem stöðum, en af öðru sem er að berast má nefna nýjar hurðir fyrir millidekk og dekkhúsin, ný lestarlúga millidekks, klæðningarefni og einangrun ásamt því að nýtt loftræstikerfi var að berast.

Í þessari viku var togvindunum komið fyrir um borð eins og sjá má á meðfylgjandi mynd. Nýr skutrennuloki var einnig settur um borð og er verið að mála hann og koma fyrir í nýja skutrennuvasanum. Búið er að mála brúna að utan, en rafvirkjar eru að tengja kapla til að koma siglingaljósum á skipið. Einnig er byrjað á vinnu við að skipta um brúargluggana. Rafvirkjar vinna við að tengja rafal við rafmagnstöflur. Byrjað er að leggja loftræstistokka í nýja borðsalinn, en þar er einnig byrjað að steypa í gólf með flotsteypu.