Laugardaginn 27. sept. s.l. var þess minnst að 6. ágúst 2003 voru liðin 70 ár frá stofnun Kaupfélags Fáskrúðsfirðinga, móðurfélags LVF. Hátíðarsamkoma var í Félagsheimilinu Skrúð kl. 14.00 að viðstöddu fjölmenni. Félagar frá Óperustúdíói Austurlands skemmtu með söng sínum við undirleik Keiths Reed. Þau sem söngu voru Tinna Árnadóttir, Herbjörn Þórðarson og Vígþór Sjafnar Zophoníasson. Kaupfélaginu bárust góðar gjafir og heillaóskir í tilefni tímamótanna. Ávörp fluttu Kjartan Reynissson stjórnarformaður, Gísli Jónatansson kfstj., Einar Jónsson fyrrv. kfstj. Kf. Fáskrúðsfirðinga, Jón Kristjánsson heilbrigðisráðherra, Hermann Hansson fyrrv. kfstj. Kf. Austur-Skaftfellinga, Guðmundur Þorgrímsson oddviti Búðahrepps, Gunnlaugur Arinbjarnarson kfstj. Kf. Héraðsbúa og Jónas Jónasson frá Kolmúla. Fimm voru heiðraðir fyrir löng og farsæl störf sín fyrir kaupfélagið. Þeir eru Óskar Sigurðsson Þingholti, Jónas Jónasson frá Kolmúla, Guðjón Daníelsson Kolmúla, Björn Þorsteinsson Þernunesi og Einar Jónsson fyrrv. kfstj. Fimm manns sem eru jafnaldrar kaupfélagsins fædd 1933 voru afhentar gjafir frá félaginu. Þau eru Geir Helgason, Hjördís Ágústsdóttir, Jónína Árnadóttir, Jóhann Gestsson og Sonja Andrésdóttir. Þá var Ungmennafélaginu Leikni færðar að gjöf kr. 70.000,- og veitti Pálína Margeirsdóttir peningunum viðtöku fyrir hönd Leiknis. Í lok samkomunnar var Gísla Jónatanssyni kfstj. og konu hans Sigrúnu Guðlaugsdóttur afhent blómakarfa. Kl. 23.00 var haldin flugeldasýning og kl. 23.15 hófst opinn dansleikur í Skrúð, þar sem hljómsveitin Nefndin lék fyrir dansi.

Víkingur Ak 100 landaði í dag 219 tonnum af síld úr Berufjarðarál. Í vinnslu fóru 68 tonn, en 151 tonn í bræðslu.

Víkingur AK 100 landaði í morgun 148 tonnum af síld sem veiddist í Berufjarðarál. Síldin var smá og fóru 64 tonn til vinnslu, en 84 tonn í bræðslu.

Laugardaginn 27. sept. 2003 verður þess minnst að 6. ágúst s.l. voru liðin 70 ár frá stofnun Kaupfélags Fáskrúðsfirðinga. Hátíðarsamkoma verður í Skrúð kl. 14.00, þar sem m.a. félagar frá Óperustúdiói Austurlands skemmta undir stjórn Keiths Reed. Kl. 23.00 verður flugeldasýning og kl. 23.15 hefst dansleikur í Skrúð, þar sem Jón Arngrímsson og félagar leika fyrir dansi. Öllum velunnurum félagsins er boðið að taka þátt í hátíðarhöldunum. Vonast er til að flaggað verði sem víðast á Fáskrúðsfirði þennan dag.

Víkingur AK landaði 100 tonnum af síld í dag og fóru um 63 tonn af henni til vinnslu. Síldin er blönduð millisíld. Í fyrradag landaði Víkingur 125 tonnum af síld sem fóru í bræðslu.

Hagnaður af starfsemi Loðnuvinnslunnar h/f fyrstu 6 mánuði ársins nam kr. 43 millj. eftir skatta. Á sama tíma í fyrra var hagnaður LVF kr. 295 millj. Hagnaður félagsins fyrir afskriftir og fjármagnsliði (EBITDA) nam kr. 198 millj. og veltufé frá rekstri var kr. 162 millj. Heildartekjur félagsins voru kr. 1.372 millj. og lækkuðu um kr. 52 millj. frá sama tíma árið 2002. Eigið fé félagsins var kr. 1.370 millj., sem er 43% af niðurstöðu efnahagsreiknings. Nettó skuldir voru kr. 1.184 millj. og höfðu hækkað um kr. 67 millj. frá fyrra ári.



Aðal ástæður lakari afkomu LVF eru að fjármagnliðir eru nú neikvæðir um kr. 58 þús., en voru jákvæðir í fyrra um kr. 103 millj. Í öðru lagi hefur framlegð landvinnslu lækkað verulega vegna styrkingar íslensku krónunnar og versnandi ástands á erlendum mörkuðum, en heildartekjur fiskvinnslu lækkuðu um kr. 76 millj. miðað við fyrra ár.



Fiskimjölsverksmiðja LVF tók á móti 75 þús. tonnum af hráefni á tímabilinu, en 58 þús. á sama tíma í fyrra. Þann 25. ágúst s.l. hafði fiskimjölsverksmiðjan tekið á móti 104 þús. tonnum af hráefni, sem er nýtt met frá því verksmiðjan tók til starfa árið 1996.



Afkoma LVF á seinni helmingi ársins ræðst m.a. af því hvernig veiðar og vinnsla á síld koma til með að ganga og af þróun á gengi íslensku krónunnar.


Sjá milliuppgjör undir ársskýrslum.

Búið er að taka á móti 101 þúsund tonnum til vinnslu í fiskimjölsverksmiðju Loðnuvinnslunnar. Er þetta í annað sinn sem tekið hefur verið á móti meira en 100 þúsund tonnum frá því að verksmiðjan var byggð 1995.



Ennþá er mikil kolmunnaveiði og er Hoffell að landa í fjórða sinn í ágúst, en reikna má með að kolmunninn fari að hreyfa sig í suður átt hvað úr hverju og haustbrælur að byrja og þá verði erfiðara að ná í hann en verið hefur undanfarið. En aðeins er búið að veiða rúmlega helming af úthlutuðum kolmunnakvóta.

Ingunn AK landaði tæpum 2000 tonnum af kolmunna um helgina.

Kaupfélag Fáskrúðsfirðinga er 70 ára í dag. Það var stofnað 6. ágúst 1933 á Fáskrúðsfirði. Kaupfélag Fáskrúðsfirðinga hefur um dagana rekið umfangsmikla atvinnustarfsemi á Fáskrúðsfirði svo sem verslun, sláturhús og sölu landbúnaðarvara, fiskvinnslu, útgerð, fiskimjölsverksmiðju, vélaverkstæði, rafmagnsverkstæði, trésmíðaverkstæði, umboð fyrir Olíufélagið h/f frá stofnun þess 1946 og umboð fyrir Samvinnutryggingar g/t fyrr á árum. Þá rak félagið um árabil Gistihúsið Valhöll, þar sem einnig var veitingarekstur. Frá 1. janúar 2002 hefur Kaupfélag Fáskrúðsfirðinga verið rekið sem eignarhaldsfélag og er aðal eign þess 83,89% hlutafjár í Loðnuvinnslunni h/f á Fáskrúðsfirði, en til þess félags voru rekstrareiningar Kaupfélags Fáskrúðsfirðinga fluttar. Um s.l. áramót voru félagsmenn í Kaupfélagi Fáskrúðsfirðinga 191 talsins. Afmælisins verður minnst laugardaginn 27. september n.k. Kaupfélag Fáskrúðsfirðinga ber aldurinn vel, en hagnaður þess fyrstu 6 mánuði ársins var kr. 40 millj. og eigið fé þess kr. 838 millj. sem er 92% af niðurstöðu efnahagsreiknings.

Aðalfundur LVF sem haldinn var 29. mars 2003 samþykkti að greiða 5% arð til hluthafa vegna rekstrar ársins 2002. Bréf var sent út til hluthafa um að þeir gæfu upp bankareikning, þar sem mætti leggja inn arðinn. Enn eiga nokkrir hluthafar eftir að senda inn reikningsnúmer sín, svo að hægt sé að greiða þeim arðinn, og eru þeir vinsamlegast beðnir um að hafa samband við skrifstofu LVF í síma 4705000 eða senda umbeðnar upplýsingar með tölvupósti til jonk@lvf.is

Nýlega fóru fram viðskipti með hlutabréf í LVF. Þá voru seld hlutabréf að nafnvirði kr. 9,2 millj. á genginu 3,54 eða fyrir kr. 32,6 millj.

Hoffell landaði 999 tonnum af kolmunna þann 17/7 og 1160 tonnum 20/7. Hinn 19/7 lönduðu tvö erlend skip kolmunna. Færeyska skipið Júpiter landaði 847 tonnum og danska skipið Orkama 795 tonnum. Fiskimjölsverksmiðja LVF hefur nú tekið á móti 92000 tonnum af hráefni það sem af er árinu. Fyrirhugað er að verksmiðjan verði ekki í gangi um helgina á „Frönskum dögum“.