Árið 2020 verður flestum í minnum haft vegna ástandsins sem skapað hefur heilsu manna í hættu en hjá Loðnuvinnslunni hefur árið, þrátt fyrir allt, verið gjöfult, afrek hafa verið unnin. Ljósafell hefur komist yfir eins milljarða múrinn í aflaverðmætum. Hefur skipið aldrei áður komist yfir milljarð á fyrstu níu mánuðum ársins líkt og nú.  Hjálmar Sigurjónsson skipstjóri á Ljósafellinu sagði að það væri virkilega gaman að ná þessu marki. “Við erum rígmontnir” bætti hann við og sagði líka að að ekki aðeins hefði gengið vel að veiða, það hefði líka fengist góð verð fyrir aflann.

Langmest af afla Ljósfells fer í frystihúsið og er unninn heima á Fáskrúðsfirði, en karfi fer á markað og stundum annar afli þegar mikið er að gera við vinnslu á uppsjávarfiski. 

Áhöfninni var færð kaka að þessu tilefni og Hjálmar sagði að hún hefði bragðast afar vel “og ég borðaði stefnið í gærkveldi” bætti hann hlæjandi við. Við nánari eftirgrennslan kom það í ljós að menn borða gjarnan fyrst utan af kökunni, líkt og mönnum ói við að borða sjálft skipið en skipstjórinn fullyrti að það færi álíka vel í maga eins og á sjó.

Þegar greinarhöfundur spjallaði við Hjálmar var Ljósfell á karfaveiðum í Lónsdýpi í sól og blíðu. Og segja má að ævi þessa 47 ára gamla happafleys hafi verið líkt og sólskinsdagur.

Hjálmar svaraði því aðspurður að áhöfnin á Ljósafelli væri samheldin og um borð ríkti góður andi. Þegar skipstjórinn sagði frá sá greinarhöfundur áhöfnina fyrir sér, sitjandi við borð í matsalnum, slá á létta strengi og gæða sér á köku sem fengin var fyrir vel unnin störf , og þá datt út úr spyrjandanum; “get ég ef til vill fengið pláss hjá þér”? Hjálmar skipstjóri svaraði að bragði að það væri ekki útilokað en helst ekki á þessum árstíma þegar verður eru válynd, “ég reyni að taka bara nýliða þegar von er á góðu veðri” sagði þessi geðþekki skipstjóri sem lætur sér annt um sitt fólk.

Í ljósi allra þeirra afreka sem unnin eru hjá Loðnuvinnslunni á degi hverjum ljúkum við  með þessum fleygu orðum:

“Ekkert afrek var nokkru sinni unnið án áhuga.” – Ralph Waldo Emerson

BÓA

Það hefur gengið vel hjá Hoffellinu það sem af er ári. Aflaverðmæti er komið yfir 1 milljarð króna sem verður að teljast afar góður árangur, sér í lagi í ljósi þess að engin var loðnan s.l vetur, og full ástæða til að fagna slíkum áfanga. Áhöfinni var færð kaka að þessu tilefni sem gerð voru góð skil.  “Kakan klikkar ekkert” sagði Sigurður skipstjóri þegar kökuna bar á góma og hann var að vonum stoltur og ánægður með árangurinn og sagði réttilega að þetta snérist allt um verðmæti. 

Hoffellið er í síðasta síldartúrnum að sinni. Þegar greinarhöfundur náði tali af skipstjóranum var skipið komið út undir Skrúð á leið norður í Seyðisfjarðardýpi þar sem freista skal þess að ná í loka 400 tonnin af síldinni. “Síldin hefur verið mjög góð á þessari vertíð” svaraði Sigurður aðspurður.  

Eftir þennan síldartúr fer Hoffell í slipp til Færeyja. Þar á að ljúka við að skipta út kælikerfinu. Undirbúningsvinna hefur þegar farið fram í síðasta slipp en nú er komið að því að ljúka því verki.  Nýja kerfið verður ammoníak-kerfi en  það er náttúrlegt efni sem kælir umtalsvert hraðar og betur en það sem áður var. En kæling getur skilið á milli hversu góður afli kemur að landi og því mikilvægt er að kæla aflann sem hraðast niður. 

Sigurður skipstjóri fer í frí meðan skipið verður í slipp og þegar hann var inntur eftir því hvort að hann ætlaði að gera eitthvað sérstakt í fríinu sínu svaraði hann að það væri svo sem ekki margt, ekki væri gott að ferðast mikið á þessum tímum svo að tímanum verður varið með fjölskyldunni. Það má sjálfsagt segja um aðra áhafnameðlimi Hoffels líka. Heima að brasa með börn og bú og ef til vill æfa sig í svolítilli núvitund.

BÓA

Til er fallegt kínverskt máltæki sem segir: “Ein kynslóð sáir til trésins, önnur situr í skugga þess”.  Þessi setning kom í hugann þegar Kaupfélagið færði Félagi eldri borgara á Fáskrúðsfirði 75” tommu snjallsjónvarp ásamt Bluray spilara að gjöf. Er búið að koma sjónvarpinu fyrir í Glaðheimum þar sem félagsstarfið fer fram. Þórormur Óskarsson er formaður félagsins og sagði hann að gjöfin væri afar kærkomin. “Nú getum við haft ljósmyndasýningu á skjánum, við getum horft á mynddiska auk þess að horfa á sjónvarpsdagská”. Og þegar greinarhöfundur átti spjall við Þórorm voru viðstaddir að horfa á upplýsingafund almannavarna. “Við erum afar þakklát fyrir gjöfina” bætti Þórormur við og sagði að Félag eldri borgara á Fáskrúðsfirði kæmi til með að hafa litlar tekjur þetta árið líkt og mörg önnur félög þar sem starfsemi hefur verið afar takmörkuð vegna faraldursins. En nú er verið að reyna að blása í lúðra og hafa opið tvisvar í viku ef fólk vill líta inn og taka í spil, spjalla og fá sér kaffisopa eða horfa á sjónvarpið í góðum félgsskap.

BÓA

Síðastliðna viku hefur Hafrafell verið í yfirhalningu í slippnum á Akureyri. Áætlað er að verkið taki um viku til viðbótar áður en báturinn verður klár til veiða að nýju. Í dag lítur hann svona út eftir þrif og málningu.

Sandfell fór niður úr slippnum á Akureyri fyrir helgi og þá var Hafrafell tekið upp á sama tíma.

Sandfell var 2 vikur í slippnum í fyrirbyggandi viðhaldi og reiknað er með að Hafrafell verið svipaðan tíma.