Tryggvi Sigmundsson
Tryggvi Sigmundsson er elsti starfsmaður Loðnuvinnslunnar. Hann er fæddur19. desember 1945 á Gestsstöðum í Fáskrúðsfirði. Hann er í það minnsta með pappíra uppá það, eins og hann segir sjálfur frá. Tryggvi ólst upp á Gestsstöðum og langaði að verða bóndi þegar hann var barn en ekki varð sá draumur að veruleika frekar en flestir draumar barna um framtíðarstörf. Fimmtán ára gamall fór Tryggvi að vinna hjá Kaupfélagi Fáskrúðsfirðinga, kom þá á reiðhjóli frá Gestsstöðum. „Ég man svo vel eftir því þegar ég varð sextán ára gamall, því þá hækkaði kaupið“ sagði Tryggvi sposkur.
Í kring um 1996 kaupir Tryggvi húsið Heiði í Búðaþorpi og hefur störf hjá Loðnuvinnslunni og vinnur þar enn. Þegar undirrituð spurði Tryggva hvort að hann væri með bíladellu, kvað hann svo ekki vera. Hann segist vera búinn að eiga u.þ.b. tíu bíla í gegn um tíðina og alltaf leiðst að þurfa selja þá frá sér. „Fyrsti bíllinn var Rússajeppi sem ég keypti af pabba um 1962“ segir Tryggvi og rifjar upp hann hafi oft keyrt hratt og glannalega á sínum yngri árum. „Ég þótti heldur aðsópsmikill á bíl í þorpinu á þeim tíma, en það hefur enginn minnst á það lengi, ætli þeir séu ekki flestir dánir sem muna eftir því“. „En málið er að fyrst þegar ég fékk bílpróf ók ég mjög gætilega, svo fór ég að aka eins og apaköttur en er svo löngu farinn að aka eins og maður“. Þegar rætt er um bíla við Tryggva verður ekki hjá því komist að minnast á það að hann eigi fjóra bíla fyrir utan húsið sitt og þar af einn vörubíl. Aðspurður sagði Tryggvi að hann ætti efitt með að selja það sem hann eignaðist, vill helst halda í það sem hann á. Hann segist líka kunna betur að meta gamla hluti, „stundum kaupi ég nýja hluti og tek þá ekki einu sinni upp úr kassanum og ef ég hef ákveðið að taka til og henda einhverju dóti verð ég bara lasinn“ segir Tryggvi brosandi.
Við töluðum svolítið um liðinn tíma eins og gjarnan vill verða í spjalli. Þá sagði Tryggvi að hann hefði oftast „dottið í það“ á jólum og páskum en hann væri nánast alveg hættur því. Hann væri t.d. búinn að eiga tvær flöskur í ellefu ár. Þá sagði hann að honum hefði verið ráðlagt það að fá sér eitt staup af koníaki fyrir svefninn, svona til heilsubótar en hann hefði nú ekki fundið mikinn mun. „Enda trúi ég ekki á brennivín í lækningaskini“ sagði hann og klóraði sér spekingslega í kollinum.
Þar sem þessi heiðursmaður býr einn á Heiði lá beinast við að spyrja hann hvort að hann yrði stundum einmanna. „Nei, ég fer þá bara í bílinn og keyri aðeins um og stundum koma karlar í heimsókn og þá renni ég á kaffi“. Hann sagðist líka vera mikill kaffi karl, „ég vil hafa það sterkt og gott, ég verð veikur af daufu kaffi“.
Tryggvi er á 72 aldurári og mætir í vinnuna á hverjum degi. Aðspurður hvort að hann væri hraustur svarði hann kankvís, „ég held að ég sé að drepast á hverjum degi, en ég hef það aldrei af“. Hann bætir því við að hann vilji gjarnan vinna á meðan hann getur því honum sé lagið að snúa sólarhringnum við þegar hann er í fríi. „Mér líður vel að keyra bláa bílinn (flutningabíll í eigu Loðnuvinnslunnar) ég gleymi því meira að segja stundum að ég eigi hann ekki sjálfur“. Hann tekur líka fagnandi á móti unga fólkinu sem kemur í vinnu á vertíðum því þau lífga uppá vinnustaðinn. Og hann kann líka vel við erlenda fólkið sem kemur í vinnu, ýmist tímabundið eða hefur sest að hérna í þorpinu. „Auðvitað er fólk misjafnt hvaðan sem það kemur, enda er ekki farið að klóna fólk“.
Undirrituð skaut einni spurningu að viðmælandanum um leið og hún kvaddi: „ertu skapléttur Tryggvi?“ „Já, ég er skapléttur ef engin urgast í mér að óþörfu“ , svaraði Tryggvi Sigmundsson og brosti breitt því til staðfestingar.
BÓA
Ljósafell
Félagsfundir KFFB
Hoffellin
Ljósafell
Hoffell
Kolmunninn er kominn
Ljósafell
Ýtt undir notkun á endurnýjanlegri orku
Á dögunum rituðu Landsvirkjun og FÍF ( Félag íslenskra fiskmjölsframleiðenda) undir viljayfirlýsingu þess efnis að ýta undir notkun á endurnýjanlegri orku.
Fram til þessa hafa fiskmjölsframleiðendur notast bæði við olíu og rafmagn við sína framleiðslu en það rafmagn sem keypt hefur verið er svokallað skerðanlegt rafmagn sem Landsvirkjun selur á heildsöluverði. Á því hefur verið takmarkað framboð sem ræðst að mestu af því hvernig vatnsbúskapur Landsvikjunnar stendur. Markmiðið að gera fiskmjölsframleiðslu enn umhverfisvænni með því ýta undir notkun rafmagns við vinnsluna, draga þar með úr losun koltvísýrings og styðja um leið við markmið Parísarsamkomulagsins og skuldbindingar Íslands samkvæmt því.
Í áðurnefndri yfirlýsingu segir að Landsvirkjun ætli að stuðla að því eins og hægt er að auka framboð á skerðanlegu rafmagni og FÍF ætlar að hvetja sína félagsmenn til þess að gera mjölframleiðslu enn umhverfisvænni með því að nota endurnýtanlega orkugjafa í stað þeirra sem menga meira.
Hjá Loðnuvinnslunni hefur verið notast bæði við rafmagn og olíu. Hefur notkunin ráðist annars vegar af framboði á skerðanlega rafmagninu og hins vegar af verði milli orkugjafanna. Árið 2015 var rafmagnsnotkunin töluverð, framleidd voru 83 þúsund tonn og notast við aðeins 472 tonn af olíu. Á síðasta ári var hins vegar notast við meiri olíu. Framleidd voru 64 þúsund tonn og notað við það 1777 tonn af olíu. Skýringin á mismuninum felst í því hve óhagstætt verðið var og trega var á flutningsgetu.
Með viljayfirlýsingunni binda menn vonir um að hægt verði að notast við rafmagn við mjölframleiðsluna í miklu ríkara mæli og framleiðslan verði þá að sama skapi grænni og vænni.
BÓA
Magnús Þorvaldsson
Magnús Þorvaldsson er fæddur í janúar 1942 og er því 75 ára gamall. Hann er fæddur og uppalinn hér í Búðaþorpi, yngstur fimm systkina. Faðir hans byggði hús hér í bæ sem kallast Álfhóll og stendur enn. Lítið steinsteypt hús sem stendur við Skólaveg 70. Í þá daga var meira um vert að eiga sér þak og heimili heldur en fjöldan allan af fermetrum og á æskuheimili Magnúsar var mannmargt , foreldrarnir með börnin sín fimm, amma og föðurbróðir. Og allir undu vel við sitt. Seinna byggði Þorvaldur faðir Magnúsar húsið Bæ sem stendur við Búðaveg 52 og bjó fjölskyldan þar um tíð þar til þau tóku sig upp og fluttu til Reykjavíkur 1954.
Magnús átti ættingja á Stöðvarfirði og fór gjarnan þangað á sumrin til að vinna. Átján ára gamall fór hann í Sjómannaskólann og eftir útskrift þaðan flutti hann til Stöðvarfjarðar og bjó þar og starfaði í tuttugu ár.
Starfsævinni hefur Magnús eytt á sjó, verið skipstjóri og sótt gull í greipar Ægis og var síðasta fastaplássið hjá Granda en þar lét Magnús af störfum 70 ára gamall. Hann lítur sáttur til baka og segist vera ríkur maður, hann eigi einn stjúpson, tvö afabörn og eitt langafabarn.
En þó að fastráðingar verði ef til vill ekki fleiri hjá þessum lífsglaða manni hefur hann nú ekki alveg lagt sjóvettlingana á hilluna. Fyrir skemmstu fór Magnús með „gamla Hoffellið“ , þ.e Hoffell II Su 802, á sjó. Skipið var mannað, kapteinn settur í brúnna og af stað fór það, án veiðafæra að vísu því að tilgangur fararinnar var að taka afla af Hoffelli Su 80. Tvo slíka túra fór Magnús með Hoffell II og aðspurður að því hvernig honum fyndist að setjast í skiptjórastólinn 75 ára gamall og fara til sjós svaraði hann: „ það er mjög gaman, maður yngist bara. Það er svo gaman að vera innan um mennina um borð bæði þá eldri og reyndari og ekki er síðra að fá að fylgjast með ungu mönnunum sem eru að stíga sín fyrstu skref í sjómennskunni“.
En hvernig er að fara til sjós án veiðafæra? „Það er svolítið örðuvísi“ svaraði Magnús, „en ég hef gert þetta áður á Víkingi frá Akranesi og þá vorum við að sækja Makríl“. „En getur það orðið varasamt að leggjast þétt að öðrum stórum skipum en þá skiptir höfuðmáli að hjálpast að og það gekk snuðrulaust fyrir sig, áhafnirnar á báðum Hoffellum löggðu sig fram um að gera þetta vel og verkið var unnið af mikilli fagmennsku og öryggi“.
Aðspurður að því hvernig Hoffell II reyndist á sjónum svaraði Magnús því til að hann væri mjúkur og góður og að það heyrðist varla í vélunum. „Ég hef aldei áður verið á bát þar sem vélarnar standa á gúmmípúðum eins og í fínum skemmtiferðaskipum, ég hrökk upp um miðja nótt og hélt að það væri dautt á“ sagði Magnús og hló við.
Og aftur ætlar Magnús að stýra Hoffelli II, það er leið til Akureyrar í botnhreinsun og snyrtingu ýmiskonar eins og gömul og góð skip eiga skilið eftir vinnutörn og mun Magnús Þorvaldsson stýra því heilu í höfn.
BÓA
Ljósafell
Ljósafell er nú að landa um 50 tonnum eftir stuttan túr. Uppistaða aflans er þorskur. Þetta er fyrsta heimalöndun skipsins eftir að hafa tekið þátt í togararalli Hafrannnsóknarstofnunar undanfarnar þrjár vikur. Jafnframt er þetta fyrsti vinnsludagur frystihússins í bolfiski eftir að hrognafrystingu lauk á þriðjudag.