Hoffell á landleið með rúm 2.000 tonn af Kolmunna.

Hoffell er á landleið með rúm 2.000 tonn af Kolmunna og verður í fyrrmálið.  Hoffell hefur þá veitt 18.500 tonn af kolmunna á árinu og tæp 32.000 í heildina í öllum tegundum.

Næst verður farið á Makrílveiðar þegar hann byrjar að gefa sig.

Mynd: Valgeir Mar Friðriksson.

Loðnuvinnslan styður og styrkir

Á aðalfundi Loðnuvinnslunnar hf, sem haldinn var í Wathnessjóhúsi þann 12.maí 2023 útdeildi fyrirrækið styrkjum til hinna ýmsu málefna.

Ungmennafélagið Leiknir fékk afhentar 17 milljónir króna til íþrótta og æskulýðsstarfa.  Vilberg Marinó Jónsson er formaður Leiknis og sagði hann að þessi styrkur skipti sköpum fyrir félagið. “ Ekki aðeins leggur þessi upphæð þungt lóð á vogaskálarnar við rekstur félagsins, en innan þess eru margar deildir, heldur gefur okkur kost á því að stofna nýjar deildir innan félagsins” sagði Vilberg er hann var inntur eftir viðbrögðum við styrknum.  Hann sagði að það væri í vinnslu að stofna rafíþróttadeild innan Leiknis sem slæst þá í för með þeim deildum sem fyrir eru.  Vilberg sagði einnig að til greina kæmi að stofna einhvers konar styrktarsjóð sem iðkendur gætu sótt í til þess að komast á íþróttamót. Er hugsunin á bak við það að jafna möguleika barna og ungmenna til íþróttaiðkunar því sannarlega eru aðstæður heimila misjafnar. “Þetta er mjög rausnarlegur styrkur og við erum afar þakklát Loðnuvinnslunni” sagði Vilberg Marinó.

Þá lætur LVF 10 milljónir króna af hendi rakna til starfsmannafélags Loðnuvinnslunnar til styrktar því góða starfi sem þar fer fram. Arnfríður Eide Hafþórsdóttir er formaður starfsmannafélagsins og var að vonum afar ánægð með styrkinn og sagði: “Það er ómetanlegt að fyrirtækið styrki starfsmannafélagið svona rausnarlega því það er mjög mikilvægt að starfsfólk komi saman utan hefðbundins vinnutíma og geri sér glaðan dag því slíkt eflir liðsheildina og eykur starfsánægju”.

Starfsmannafélag LVF er ötult félag sem stendur fyrir margvíslegum ferðum og atburðum fyrir sitt fólk.  Arnfríður sagði að margt spennandi væri fram undan og mætt þar nefna sjómannadagsskemmtun þar sem boðið verður upp á veitingar og lifandi tónlist. “Og í október ætlum við að fara í tíu daga ferð til Sikileyjar þar sem allir geta heldur betur hlaðið batteríin í hlýjunni” sagði Arnfríður og heyra mátti eftirvæntingu í röddinni sem án efa er að finna hjá öðru starfsfólki líka.

Síðan verður fjölskyldu-jólastund á aðventunni. Að sögn Arnfríðar stóð starfsmannafélagið fyrir slíkri skemmtun á síðasta ári og heppnaðist hún býsna vel. “Það yljaði um hjartarætur að sjá breið bros á litlum andlitum innan um fjölskyldu og vini svo ekki sé nú minnst á jólasveinana” sagði Arnfríður  og bætti því við að stjórn starfsmannafélagsins væri afar þakklátt fyrir þennan rausnarlega styrk.

Félag um Franska daga fékk 1.8 milljónir í styrk til þess að halda bæjarhátíðna Franska daga. Nánar má lesa um þessa styrkveitingu í greininni um styrki Kaupfélagsins.

Björgunarsveitin Geisli hlaut 1 milljón króna til styrktar sinni starfssemi. Það er hverju samfélagi mikilvægt að hafa innan sinna raða félagsskap sem er tilbúin til þess að láta til sín taka þegar slys, hamfarir eða aðrir erfiðleikar berja að dyrum. Loðnuvinnslan hefur í gegn um tíðina verið dyggur og trúr stuðningsaðili Geisla og á því er engin breyting.

Gretar Helgi Geirsson er formaður björgunarsveitarinnar Geisla og sagði að svona myndarlegur styrkur hefði mikla þýðingu fyrir sveitina bæði hvað varðar rekstraröryggi, því útgjöld geta verið óvænt ef útköll verða mjög stór, auk þess að geta mögulega lagt fyrir í endurnýjun búnaðar og viðhaldið þeim sem fyrir er. 

“ Við þökkum Loðnuvinnslunni kærlega fyrir okkur” sagði Gretar Helgi formaður.

Að samanlögðu eru styrkirnir sem Loðnuvinnslan hf og Kaupfélag Fáskrúðsfirðinga veittu að þessu sinni 32,6 milljónir króna.

Eftir þessa rausnarlegu útdeilanir styrkja frá LVF og KFFB komu þessi fleygu orð upp í hugann og við hæfi að gera þau að lokaorðum.

-Gefðu alltaf án þess að muna og þiggðu alltaf án þess að gleyma.

BÓA

Frá vinstri: Friðrik Mar Guðmundsson framkvæmdastjóri LVF, Elvar Óskarsson stjórnarformaður LVF, Birkir Snær Guðjónsson formaður Félags um Franska daga, Steinar Grétarsson starfsmannafélagi Loðnuvinnslunnar, Grétar Helgi Geirsson formaður björgunarsveitarinnar Geisla og Vilberg Marinó Jónsson formaður Leiknis.

Kaupfélagið styður og styrkir

Á aðalfundi Kaupfélags Fáskrúðsfirðinga, sem haldinn var í Wathnessjóhúsi  föstudaginn 12.maí 2023, voru afhentir styrkir til eflingar samfélagsins.

Hollvinasamtök Skrúðs fengu 1 milljón til áframhaldandi uppbyggingar félagsheimilisin Skrúðs.  Eins og flestum er kunnugt er Skrúður í eigu sveitafélagsins en Hollvinasamtökin hafa komið að viðhaldi og endurreisn hússins með miklum ágætum.  Á milli eigenda og samtakanna er mikið og gott samstaf um áætlun og framkvæmdir og hafa Hollvinasamtökin fulla stjórn á því í hvað þeir fjármunir fara sem samtökin ráða yfir. 

Kaupfélagið hefur verið dyggur stuðningaðili Hollvinasamtaka Skrúðs og hafa þeir fjámunir aðallega farið í að kaupa alls konar búnað sem nýtist bæjarbúum vel þegar nota skal húsið til hinna ýmsu mannfagnaða. Má þar nefna búnað í eldhús, myndvarpa, hljóðkerfi og fleira í þeim dúr, auk glugga sem samtökin keyptu en sveitafélagið sá um að koma á sinn stað.

Smári Júlíusson er formaður Hollvinasamtaka Skrúðs og sagði hann að styrkurinn væri afar vel þeginn og kæmi sér vel. Af nægu er að taka þegar kemur að viðhaldi og uppbyggingu byggingar sem komin er nálægt sextugs aldri.

Félagsskapur um Franska daga hlaut í styrk 1.8 milljón króna frá Kaupfélaginu og 1.8 milljón frá Loðnuvinnslunni. Um er að ræða félagsskap sem er framkvæmdaraðili fyrir bæjarhátíðinni Franskir dagar sem haldin er í lok júlí á Fáskrúðsfirði.

Birkir Snær Guðjónsson er formaður félags um Franska daga og sagði hann það forréttindi að hafa svo dygga stuðningsaðila líkt og Kaupfélagið og Loðnuvinnsluna. “Þetta eru fyrirtæki sem eru tilbúin að leggja heilmikið til samfélagsins og það er frábært” sagði Birkir.

Það kostar mikla peninga að halda glæsilega bæjarhátíð sem býður upp á dagskrá fyrir alla aldurshópa og því koma þessir fjármunir sér vel og þeim verður vel verið okkur öllum til ánægju.

“Við erum gríðarlega þakklát fyrir styrkina sem við fáum frá Kaupfélaginu og Loðnuvinnslunni” sagði Birkir Snær að lokum.

Að samanlögðu eru styrkirnir sem Kaupfélag Fáskrúðsfirðinga og Loðnuvinnslan hf veittu að þessu sinni 32,6 milljónir króna.  Af góðum hug koma góð verk.

BÓA

Frá vinstri: Friðrik Mar Guðmundsson kaupfélagsstjóri, Jóna Björg Jónsdóttir sem tók við styrk fyrir hönd Hollvinasamtaka Skrúðs, Birkir Snær Guðjónsson formaður Félags um Franska daga og Steinn Jónasson stjórnarformaður Kaupfélagsins.

Aðalfundur Loðnuvinnslunnar

Rekstur Loðnuvinnslunnar gekk afar vel á síðasta ári, reyndar skilaði árið methagnaði og því óhætt að fullyrða að fyrirtækið sé stöndugt en síðasta ár var langbesta rekstrarár Loðnuvinnslunnar. 

Aðalfundur Loðnuvinnslunnar hf var haldinn 12.maí 2023 og hér birtast helstu niðurstöðutölur.

Hagnaður af rekstri félagsins eftir skatta árið 2022 var 3.483 milljarðar króna á móti 1.247 milljörðum árið 2021.

Tekjur LVF voru 18.180 milljarðar sem er 45% aukning frá fyrra ári.

Tekjur að frádregnum eigin afla voru 14.039 milljarðar.

Veltufé frá rekstri var 4.502 milljarðar á móti 1.572 milljörðum árið 2021.

Eigið fé félagsins í árslok 2022 14.895 milljarðar sem er 54% af niðurstöðu efnahagsreiknings.

Stærsti hluthafi LVF er Kaupfélag Fáskrúðsfirðinga með 83% eignarhlut. Á aðalfundi Loðnuvinnslunnar var ákveðið að greiða 20% arð til hluthafa sem gera 140 milljónir.

Nánari tölur má finna í reikningum ársins 2022 sem auðvelt er að nálgast á skrifstofu Loðnuvinnslunnar.

Í stjórn LVF eru:

Elvar Óskarsson stjórnarformaður

Steinn Jónasson

Högni Páll Harðarson

Jónína Guðrún Óskarsdóttir

Elsa Sigrún Elísdóttir

Varamenn í stjórn:

Óskar Þór Guðmundsson

Jóna Björg Jónsdóttir

BÓA

Aðalfundur Kaupfélags Fáskrúðsfirðinga

Kaupfélag Fáskrúðsfirðinga stendur traustum fótum.  Á aðlafundi KFFB, sem haldinn var 12.maí 2023 komu eftirfarandi tölur fram.

Hagnaður ársins 2022 var 2.920 milljónir.

Eigið fé félagsins var 13.536 milljónir þann 31. 12. 2022, sem er 99,8% af niðurstöðu efnahagsreiknings.

Stærsta einstaka eign félagsins er 83% eignarhlutur í Loðnuvinnslunni hf.

Í stjórn Kaupfélags Fáskrúðsfirðinga eru:

Steinn Jónasson stjórnaformaður

Elvar Óskarsson

Högni Páll Harðarson

Elsa Sigrún Elísdóttir

Óskar Þór Guðmundsson.

Varamenn í stjórn eru: Jónína Guðrún Óskarsdóttir, Ólafur Níels Eiríksson og Jóna Björg Jónsdóttir.

BÓA

Línubátar í apríl.

Sandfell og Hafrafell með mestan afla í apríl. Sandfell með 291 tonn og Hafrafell með 245 tonn.

Mynd; Þorgeir Baldursson.

Mér má sjá lokalista nr. 4.

Sæti áðurNafnHeildarafliRóðrarMesti afliHöfn
11Sandfell SU 75291.12621.6Djúpivogur, Bakkafjörður, Þórshöfn, Stöðvarfjörður
22Hafrafell SU 65244.72416.0Hornafjörður, Stöðvarfjörður, Neskaupstaður, Djúpivogur
33Tryggvi Eðvarðs SH 2226.01225.2Ólafsvík, Sandgerði
44Kristján HF 100185.21324.2Grindavík, Sandgerði, Stöðvarfjörður, Vopnafjörður
55Háey I ÞH 295179.21422.2Húsavík, Raufarhöfn
66Indriði Kristins BA 751172.81324.1Grindavík, Sandgerði, Ólafsvík
714Vigur SF 80168.01521.3Hornafjörður, Djúpivogur
87Jónína Brynja ÍS 55167.01815.6Bolungarvík
99Kristinn HU 812162.9927.4Ólafsvík
108Einar Guðnason ÍS 303155.91523.5Flateyri, Suðureyri
1112Öðlingur SU 19131.81320.7Djúpivogur
1213Fríða Dagmar ÍS 103128.11414.3Bolungarvík
1310Særif SH 25115.8628.4Grindavík, Sandgerði
1416Óli á Stað GK 99104.31116.0Grindavík, Sandgerði
1511Stakkhamar SH 220102.21118.2Rif, Arnarstapi
1615Sævík GK 75774.0812.5Grindavík
1719Gullhólmi SH 20173.7716.9Rif
1817Gísli Súrsson GK 873.4718.4Grindavík
1922Bíldsey SH 6571.6524.0Rif
2018Auður Vésteins SU 8868.7716.2Grindavík
2120Vésteinn GK 8863.5421.0Grindavík
2221Dúddi Gísla GK 4825.1219.3Grindavík

Heimsókn góðra gesta

Í dag, fimmtudaginn 11.maí, fékk Loðnuvinnslan góða gesti.  Voru hér á ferð stjórnarliðar í  Samtökum sjávarútvegssveitarfélaga, hér eftir skammstafað SÚSS.

En SÚSS eru samtök sveitarfélaga sem hafa beinna hagsmuna að gæta varðandi nýtingu sjávarauðlindarinnar og samkvæmt upplýsingum á heimasíðu samtakanna er tilgangur þeirra:

  • að standa vörð um hagsmuni aðildarsveitarfélaga og íbúa þeirra í öllum málum sem tengjast nýtingu auðlinda í veiðum, sjókvíaeldi og vinnslu.
  • að vinna að hvers konar sameiginlegum hagsmunamálum, s.s. við gerð laga og reglugerða sem varða sjávarútveg og sjókvíaeldi og stuðla að fræðslu og kynningu á málum sem því tengjast.
  • að taka þátt í mótun reglna um gjaldtöku vegna nýtingar sjávarauðlindarinnar og skiptingu á því gjaldi milli ríkis og sveitarfélaganna, ásamt öðrum fjárhagslegum og umhverfislegum atriðum sem tengjast nýtingu sjávarauðlindarinnar.
  • Að miðla upplýsingum og reynslu meðal aðildarsveitarfélaga um málaflokkinn.

Friðrik Mar Guðmundsson framkvæmdastjóri Loðnuvinnslunnar fór með gestina um fyrirtækið og sagði þeim frá starfssemi þess og uppbyggingu.

Íris Róbertsdóttir frá Vestmannaeyjum er stjórnarmaður í SÚSS og sagði hún heimsóknina hafa verið mjög áhugaverða og skemmtilega. “Þetta var frábær heimsók. Það er eitthvað fallegt á bak við hugsunina við eignarhaldið” sagði Íris og bætti því við að það væri ekki algengt að stöndugt sjávarútvegsfyrirtæki líkt og Loðnuvinnslan væri í eigu samfélagsins og vísar þar til 83% eignarhluts Kaupfélags Fáskrúðsfjarðar.

Tilgangur heimsóknarinnar er að heimsækja aðildarsveitafélög og kynnast þeim sjávarútvegfyrirtækjum sem eru starfrækt innan þeirra.  Sagði Íris að svona vinnuferðir væru afar gagnlegar því mikilvægt væri að stjórn SÚSS þekkti til þeirra fyrirtækja og hefði skilning á starfsemi þeirra.

Stjórn SÚSS hefur átt annríkt á Austurlandi þar sem þau hafa gert víðreisn og heimsótt sjávarútvegsfyrirtæki frá Djúpavogi til Neskaupstaðar.

BÓA

Frá vinstri: Þórdís Sif Sigurðardóttir Vesturbyggð, Eyrún Ingibjörg Sigþórsdóttir Dalvíkurbyggð, Björn Ingimarsson Múlaþingi, Íris Róbertsdóttir Vestmannaeyjum, Jón Björn Hákonarson Fjarðabyggð, Heimir Örn Árnason Akureyrarbæ, Friðrik Mar Guðmundsson Loðnuvinnslunni og Fannar Jónasson Grindavík.

Forsetaheimsókn

Mikið hefur verið um dýrðir í Fjarðabyggð undanfarna tvo daga því að forseti Íslands, herra Guðni Th. Jóhannesson, hefur verið hér í opinberri heimsókn ásamt fylgdarliði.

Víða mátti sjá íslenska fánann blakta við hún í Búðaþorpi í tilefni heimsóknarinnar. Eftir hádegisverð heimsótti forsetinn Grunnskóla Fáskrúðsfjarðar en hélt síðan ásamt föruneyti í Wathnessjóhús þar sem Loðnuvinnslan tók á móti forsetanum.

Friðrik Mar Guðmundsson  framkvæmdastjóri LVF bauð forsetann velkominn og sagði frá fyrirtækinu, eignarhaldi þess og starfsemi auk þess sem að sýndar voru nokkrar stuttar kvikmyndir um starfsemina. 

Berglind Ósk Agnarsdóttir sagði síðan viðstöddum örlítið frá sögu og þróun bæjarins við Fáskrúðsfjörð og lífi fólks sem hér hefur unnið og starfað og lifað sínu lífi.

Þá færði Friðrik Mar forsetanum gjafir, annars vegar fallega ljósmynd af dansandi norðurljósum yfir Fáskrúðsfirði eftir Jónínu Guðrúnu Óskarsdóttur, og hins vegar voru forsetahjónunum  færðar lopapeysur, prjónaðar af konum á Búðum. Báðum þessum gjöfum fylgdu góðar óskir um gæfu og gengi.

Því næst var gengið í frystihúsið. Þar beið hópur starfsfólks á kaffistofunni og gaf forsetinn sér góðan tíma til þess að spjalla við fólk, heilsa með handabandi og tók því afar vel er hann var beðin um að vera með á ljósmynd.

Forsetinn þakkaði vel fyrir sig og sagðist hafa notið heimsóknarinnar og þakkaði  fyrir góðar móttökur og góðar gjafir sem,  í orðsins fyllstu merkingu, ylja.

BÓA

Friðrik Mar Guðmundsson og forseti Íslands herra Guðni Th. Jóhannesson.

Frá vinstri: Arnfríður Eide Hafþórsdóttir mannauðs-og öryggisstjóri LVF og bæjarfulltrúi, Birgir Jónsson forseti bæjarstjórnar Fjarðabyggðar, Friðrik Mar Guðmundsson framkvæmdastjóri LVF, Guðni Th. Jóhannsson forseti Íslands, Jóna Árný Þórðardóttir bæjarstjóri Fjarðabyggðar, Hjördís Seljan Þóroddsdóttir bæjarfulltrúi og Þórdís Mjöll Benediktsdóttir bæjarfulltrúi.

Friðrik Mar Guðmundsson, Berglind Ósk Agnarsdóttir og Guðni Th. Jóhannesson

Forsetinn að spjalla við starfsfólk Loðnuvinnslunnar í matsal frystihússins.

Guðni forseti með tveimur starfskonum frystihússins.

Forsetinn var óspar á handabönd. Hér heilsar hann einum starfsmanni með virktum.

Hoffell er á landleið með rúm 2.000 tonn.

Hoffell er á landleið með rúm 2.000 tonn af Kolmunna af miðunum við Færeyjar.  Sérstaklega góð veiði var í veiðiferðinni, Hoffell fékk aflann á aðeins 42 tímuM.  Hoffell hefur þá veitt rúm 16.000 tonn af kolmunna á þessu ári. 

Skipið fer út strax eftir löndun.

Mynd: Valgeir Mar Friðriksson.

Ljósafell er á landeið með 115 tonn.

Ljósafell er á landeið með fullfermi 115 tonn af blönduðum afla og verður á höfn um kl. 20.00.

Aflinn er 60 tonn Utsi, 30 tonn Þorskur, 18 tonn Ýsa og annar afli. Ljósafell fer aftur út kl. 8 á mánudagsmorgun.

Hoffell á landleið með 2.250 tonn og verður í kvöld.

Hoffell kemur í kvöld með 2.250 tonn af kolmunna.  Ágæt veiði er ennþá við Færeyjar og fékk Hoffell aflann á 3 sólarhringum.

Um 330 mílur eru af miðunum til Fáskrúðsfjarðar.  Skipið fer strax út eftir löndun.

Mynd: Valgeir Mar Friðriksson.