Met í síldarsöltun

Aldrei hefur verið saltað jafn mikið af síld hjá LVF síðan byrjað var á þessari verkun fyrir 7 árum. Í dag er búið að salta í 21.000 tunnur, þar af eru 15.000 tunnur af flökum og bitum, en 6.000 tunnur er hausskorið og heilsaltað. Einnig er búið að frysta 500 tonn af flökum, sem að mestu fara á Frakkland og Eystrasaltslöndin. Saltaða síldin fer að mestu á Norðurlöndin og einnig lítillega til Kanada. Mikil vinna hefur verið í haust og það sem af er janúar í kringum síldina og aðra fiskverkun hjá Loðnuvinnslunni h/f. Myndin hér til hliðar er tekin í haust við móttöku á tómum síldartunnum.

Síld og Hjónaball

Verið er að salta og flaka síld sem Hoffell kom með í morgun. Skipið kom með um 500 tonn og verður unnið við það fram eftir degi, en þá verður tekið hlé fram yfir hádegi á morgun, því árlegt “hjónaball” verður haldið í Skrúð í kvöld. Vinnan verður að víkja í smá stund fyrir þessum ríflega 100 ára gamla sið Fáskrúðsfirðinga. Mikið fjölmenni verður á hátíðinni í kvöld, þar sem hjónafólki frá Stöðvarfirði er heimil þátttaka eftir sameiningu Búða- og Stöðvarhrepps í Austurbyggð. Bæði skip Loðnuvinnslunnar h/f verða í höfn svo að þeir sem þar eiga maka geti tekið þátt í hátíðinni.

Vinnsla hafin

Ljósafell kom til löndunar í gærmorgun með tæplega 50 tonn af fiski, aðallega þorski, og hófst þegar í stað vinnsla í frystihúsi félagsins. Hoffell kemur til löndunar í fyrramálið með síld sem verður flökuð og söltuð. Búið er að salta í rúmlega 17000 tunnur á síldarvertíðinni í haust, sem mest er flök og bitar.

Jólakveðja

Loðnuvinnslan h/f óskar starfsfólki sínu, hluthöfum, viðskiptavinum, svo og landsmönnum öllum gleðilegra jóla og farsældar á komandi ári. Þökkum samstarfið á árinu sem er að líða.

Kolmunnalöndun

Færeyska skipið Hallarklettur TN 1161 er að landa um 700 tonnum af kolmunna á Fáskrúðsfirði og hefur Loðnuvinnslan h/f þá tekið á móti 77.000 tonnum af kolmunna á árinu.

Síldarlöndun

Víkingur AK kom í morgun til Fáskrúðsfjarðar með um 250 tonn af síld.

Kolmunnalöndun

Ingunn AK kom til Fáskrúðsfjarðar kl. 11.30 með um 1800 tonn af kolmunna, sem skipið fékk í færeyskri lögsögu. Með þessum afla hefur LVF tekið á móti 76.000 tonnum af kolmunna á árinu.

Síldarlöndun

Víkingur AK kom með 300 tonn af síld til Fáskrúðsfjarðar í morgun. Síldin veiddist á Stokksnesgrunni.

Helgarferð starfsfólks LVF

Seinni partinn í dag heldur um 100 manna hópur frá LVF af stað í helgarferð til Akureyrar. Farið verður á tveimur rútum frá Austfjarðaleið og gist á Hótel KEA í tvær nætur. Það er Starfsmannafélag LVF sem að stendur fyrir ferðinni með tilstyrk frá LVF og fleiri aðilum.

Síldarlöndun

Víkingur AK landaði í nótt um 400 tonnum af síld. Síldin var mun stærri en verið hefur og flokkuðust 270 tonn til manneldisvinnslu.

Síldarlöndun

Víkingur AK kom í morgun til Fáskrúðsfjarðar með um 350 tonn af síld, sem skipið fékk skammt norðan við Litladjúp.

Víkingur AK kominn á ný

Víkingur AK 100 landaði í nótt 330 tonnum af síld, sem skipið fékk í Skerjadýpi. Síldin var frekar smá, en þó flokkuðust 162 tonn sem fara til söltunar hjá LVF.