Ferð til Prag
Vegna ferðar starfsfólks Loðnuvinnslunnar h/f til Prag verða skrifstofur LVF lokaðar frá 17/11-21/11 2005. Skrifstofurnar verða opnar frá og með þriðjudeginum 22. nóvember 2005.
Hluthafafundur LVF
Loðnuvinnslan h/f boðar til hluthafafundar þriðjudaginn 29. nóvember 2005 kl. 17.30. Fundurinn verður haldinn að Óslandi (slysavarnahúsið), Fáskrúðsfirði.
Fundarefni:
1. Hlutafjáraukning
2. Önnur mál
Milliuppgjör LVF 1/1-30/9 2005
Tap varð af rekstri Loðnuvinnslunnar h/f fyrstu 9 mánuði ársins 2005 að fjárhæð kr. 24 millj. eftir skatta samanborið við kr. 52 millj. tap á sama tímabili árið 2004.
Rekstratrekjur félagsins voru kr. 1.684 millj. og lækkuðu um 1% miðað við árið á undan, en rekstrargjöld voru kr. 1.594 og höfðu hækkað um 1%. Hagnaður fyrir afskriftir og fjármagnsliði (EBITDA) nam kr. 90 millj. samanborið við kr. 127 millj. árið áður. Veltufé frá rekstri var kr. 55 millj. en var kr. 83 millj. á 9 mánuðunum 2004. Afskriftir voru kr. 142 millj. og lækkuðu um kr. 22 millj. m.a. vegna þess að ákveðið var að hætta að afskrifa aflaheimildir hliðstætt við önnur sjávarútvegsfyrirtæki. Fjármagnsliðir voru jákvæðir um tæplega kr 38 millj. en voru neikvæðir um kr. 25 millj. á sama tíma 2004.
Félagið fjárfesti á tímabilinu fyrir kr. 323 millj. og þar af voru keyptar aflaheimildir fyrir kr. 285 millj.
Eigið fé félagsins var í lok tímabilsins kr. 1.511 millj. sem er 48% af niðurstöðu efnahagsreiknings. Nettó skuldir voru kr. 1.273 millj. og höfðu hækkað um kr. 89 millj. á milli ára.
Þriðji ársfjórðungur var Loðnuvinnslunni einstaklega erfiður. Kolmunnaveiði var nánast enginn eftir mitt ár og loðnuveiðar sömuleiðis engar. Íslenska krónan hefur haldið áfram að styrkjast og verð á olíu náð sögulegu hámarki.
Gert er ráð fyrir því að afkoma Loðnuvinnslunnar muni batna á fjórða ársfjórðungi að lokinni síldarvertíð.
Valhöll fær nýtt útlit
Síðastliðin tvö sumur hefur verið unnið að miklum endurbótum utan húss á Valhöll á Fáskrúðsfirði og er húsið í dag orðið hið glæsilegasta og vekur eftirtekt. Þeir sem unnu að þessum breytingum eru bræðurnir Hallur, Baldur og Gunnar Guðlaugssynir ásamt Baldri Rafnssyni á Vattarnesi og Herbert Hallssyni.
Valhöll er í eigu Loðnuvinnslunnar h/f og hefur húsið verið notað sem verbúð mörg síðustu ár, aðallega fyrir erlenda starfsmenn LVF.
Hús þetta á nokkuð merkilega sögu, því það var upphaflega reist í Mjóafirði árið 1897 og rifið árið 1918. Húsið var reist af Konráði Hjálmarssyni, kaup- og útgerðarmanni. Í húsinu var íbúð hans, verslun og skrifstofur og var húsið sannkölluð glæsivilla þess tíma. Þegar Konráð hættir starfsemi í Mjóafirði kaupir húsið Guðmundur Jónsson, útgerðarmaður í Króki á Fáskrúðsfirði, rífur það niður og flytur viðinn til Fáskrúðsfjarðar. Húsið er byggt á Fáskrúðsfirði nokkuð breytt frá því sem upphaflega var. Árið 1942 kaupir Kaupfélag Fáskrúðsfirðinga húsið og setur þar á fót saumastofu. Valhöll hefur gegnt hinum margvíslegustu hlutverkum á Fáskrúðsfirði. Það var m.a fyrsta fjölbýlishúsið á staðnum, en kunnast mun það vera sem Hótel Valhöll, en þar var rekin gisting og mötuneyti af kaupfélaginu í áratugi. Í húsinu eru 13 svefnherbergi með 25 rúmum, eldhús og matsalur. Auk saumastofunnar, var í húsinu m.a. póstur og sími, bakarí, raftækjaverslun, bókabúð og verkfræðistofa.
Það skemmtilega gæti átt sér stað eftir sameiningarkosningarnar 8. október n.k. að Valhöll yrði á ný í sveitarfélagi með Mjófirðingum eins og upphaflega
Ljósm. Eiríkur Ólafsson
Síldarvertíð
Hoffell kom með fyrstu síldina til Fáskrúðsfjarðar í morgun. Hoffell var með 100 tonn sem fer til vinnslu. Síldin veiddist á Breiðdalsgrunni og veiddist í nót. Öll síldin í haust verður söltuð ýmist heil eða flökuð og unnin til útflutnings að mestu fyrir markaði í Svíþjóð, Danmörku og Finnlandi.Myndin er tekinn í gær þegar skipverjar voru að taka nótina um borð.
Glaumbær til sölu
Húseign Loðnuvinnslunnar hf að Skólavegur 80 (Glaumbær)hefur verið sett á söluskrá hjá HHÚS fasteignaþjónustu, Egilsbraut 7, Neskaupstað, en HHÚS opnaði útibú á Fáskrúðsfirði 9. september s.l. að Búðavegi 35. Upplýsingar um eignina er að finna á www.hhus.is og hjá Kristínu Hjördísi Ásgeirsdóttur, lögg. fasteignasala, í sima 510-5600 og gsm. 847-5775.
Göngin opnuð
Fáskrúðsfjarðargöng, sem eru 5,9 km að lengd með vegskálum, verða opnuð kl. 16.00 í dag. Kaupfélag Fáskrúðsfirðinga og Loðnuvinnslan h/f óska Fáskrúðsfirðingum og öðrum Austfirðingum innilega til hamingju með þennan merka áfanga í samgöngumálum á Austurlandi.
Hagnaður LVF 28 millj.
Hagnaður af rekstri Loðnuvinnslunnar h/f fyrstu 6 mánuði ársins 2005 nam tæplega kr. 28 millj. eftir skatta, en var kr. 1,6 á sama tímabili árið 2004.
Rekstrartekjur félagsins að frádregnum eigin afla voru kr. 1.418 millj. og hækkuðu um 4,7 % miðað við árið á undan. Hagnaður fyrir afskriftir og frjámagnsliði (EBITDA) nam kr. 159 millj. sem er 11,2% af tekjum og veltufé frá rekstri var kr. 127 millj. eða 9% af veltu. Til samanburðar var fjármunamyndunin kr. 118 millj. eða 11,4% á sama tíma árið 2004. Afskriftir voru kr. 115 millj. og hækkuðu um kr. 6 millj. frá fyrra ári. Fjármagnsliðir voru neikvæðir um kr. 20 millj. og lækkuðu um kr. 22 millj. miðað við árið á undan.
Eigið fé félagsins var í lok tímabilsins kr. 1.478 millj., sem er 50% af niðurstöðu efnahagsreiknings og hafði hækkað um kr. 41 millj. á milli ára. Nettó skuldir voru kr. 975 millj. og höfðu lækkað um kr. 109 millj. miðað við sama tíma 2004.
Loðnuvinnslan tók á móti liðlega 81.000 tonnum af sjávarafla á tímabilinu, sem er aukning um 9.000 tonn.
Aflinn skiptist þannig: Loðna 42.000 tonn, kolmunni 36.000 tonn, síld 1.800 tonn og bolfiskur 1.600 tonn..
Afkoma félagsins á síðari hluta ársins ræðst einkum af því hvernig síldarvertíðin kemur til með að ganga, þróun olíuverðs og stöðu íslensku krónunnar.
Síldarlandanir.
Sighvatur Bjarnason VE og Íslefiur VE eru að landa fullfermi að síld í bræðslu sem skipin fengu 700 mílur norður í hafi. Samtals eru skipin með 2500 tonn.
Vinnsla hefst eftir 2 vikna sumarstopp.
Ljósafell fór á veiðar á síðasta þriðjudag og kemur til löndunar á mánudagsmorgun og hefst þá vinna eftir 2ja vikna lokun frystihússins. Eins og vanalega hefur verið unnið að ýmiskonar lagfæringum meðan vinnslustöðvun varir.
Hoffell hefur legið við bryggju í einn mánuð því mjög tregt hefur verið á kolmunnaveiðum. Skoðað verður seinni partinn í vikunni hvenær skipið fer á veiðar.
Vélstjóra og matsvein vantar.
Við leitum að vélstjóra á Ljósafell og matsveini á Hoffell. Þeir sem hafa áhuga vinsamlegast hafi samband við Eirík á skrifstofu LVF eða í síma 893-3009.
Tróndur landar síld
Færeyska skipið Tróndur í Götu kom í nótt til Fáskrúðsfjarðar með um 500 tonn af síld úr færeysku lögsögunni. Síldin verður flökuð og fryst.