Tap af rekstri Loðnuvinnslunnar h/f fyrstu 9 máunði ársins 2006 nam kr. 68 millj. Þessi niðurstaða rekstrarreiknings ræðst fyrst og fremst af breytingum á gengi íslensku krónunnar, en fjármagnsliðir eru nú kr. 330 millj. hærri en á sama tíma árið 2005.


Rekstrartekjur félagsins að frádregnum eigin afla voru kr. 1.892 millj. og hækkuðu um 12% miðað við sama tímabil 2005. Hagnaður fyrir afskriftir og fjármagnsliði nam kr. 343 millj., sem er 18% af tekjum, en var kr. 90 millj. eða 5% af tekjum árið á undan. Veltufé frá rekstri var kr. 213 millj. eða 11% miðað við 3% á sama tíma í fyrra. Afskriftir voru kr. 146 millj., sem er svipað og árið áður.


Eigið fé félagsins var í lok tímabilsins kr. 1.539 millj., sem er 50% af niðurstöðu efnahagsreiknings. Nettó skuldir voru kr. 1.192 millj. og höfðu lækkað um liðlega 80 millj. á milli ára.


Afkoma félagsins á síðasta ársfjórðungi 2006 ræðst einkum af því hvernig síldarvertíðin gengur og af þróun á gengi íslensku krónunnar.

Tap af rekstri Loðnuvinnslunnar h/f fyrstu 6 mánuði ársins 2006 nam kr. 67 millj. Þessi niðurstaða rekstrarreiknings ræðst fyrst og fremst af gengisbreytingu íslensku krónunnar, en fjármagnsliðir eru nú 383 millj. króna hærri en á sama tíma 2005.

Rekstrartekjur félagsins að frádregnum eigin afla voru kr. 1.653 millj. og hækkuðu um 17% miðað við sama tímabil 2005. Hagnaður fyrir afskriftir og fjármagnsliði (EBITDA) nam kr. 411 millj., sem er 25% af tekjum, en var kr. 159 millj. eða 11% árið á undan. Veltufé frá rekstri var kr. 290 millj. eða 18% af tekjum miðað við 9% á miðju ári 2005. Afskriftir voru kr. 97 millj. samanborið við kr. 115 millj. árið áður.

Eigið fé félagsins var í lok tímabilsins kr. 1.540 millj. sem er 46% af niðurstöðu efnahagsreiknings og hafði hækkað um kr. 61 millj. á milli ára. Nettó skuldir voru kr. 1.220 millj. og hækkuðu um kr. 245 miðað við sama tíma 2005.

Afkoma félagsins á síðari hluta ársins ræðst einkum af síldarvertíðinni í haust og þróun á gengi íslensku krónunnar.

Óskum Fáskrúðsfirðingum og gestum góðrar skemmtunar á Frönskum dögum. KFFB – LVF

LVF óskar sjómönnum og fjölskyldum þeirra innilega til hamingju með daginn.

Í dag verður formlega til hin nýja FJARÐABYGGÐ og eru þar með sameinuð í eitt fjögur sveitarfélög, Austurbyggð, Fáskrúðsfjarðarhreppur, Fjarðabyggð og Mjóafjarðarhreppur.

Fjarðalisti og Framsóknarflokkur hafa myndað meirihluta í bæjarstjórn og verður Guðmundur R. Gíslason forseti bæjarstjórnar og Guðmundur Þorgrímsson formaður bæjarráðs. Fyrsti fundur nýkjörinnar bæjarstjórnar verður haldinn þriðjudaginn 13. júní kl. 14.00 að Sólbrekku í Mjóafirði.

Íbúum hinnar nýju Fjarðabyggðar er óskað til hamingju með daginn og árnað heilla í framtíðinni. LVF

Eiríkur Ólafsson hefur látið af störfum sem fulltrúi kaupfélagsstjóra KFFB og framkvæmdastjóra LVF eftir að hafa starfað hjá Kaupfélagi Fáskrúðsfirðinga og dótturfyrirtækjum þess bæði á sjó og í landi um 32ja ára skeið.

Stjórnir félaganna og framkvæmdastjóri þakka Eiríki mjög gott samstarf og fyrir mikinn dugnað í störfum sínum fyrir félögin. Eiríki er óskað velfarnaðar á nýjum starfsvettvangi.

Við starfi Eiríks hefur tekið Kjartan Reynisson sem starfað hefur hjá KFFB og dótturfyrirtækjum í 30 ár og þar af á skrifstofum félaganna frá 1981-2005. Kjartan er boðinn velkominn á ný til starfa hjá hjá félögunum.

Finnur fríði FD 86 landaði 3. júní 318 tonnum af norsk-íslenskri síld og í kvöld er svo von á Saksabergi FD 125 með um 300 tonn af síld. Síldin hefur veiðst innan íslensku landhelginnar norð-austur af landinu og hefur verið flökuð og söltuð hjá Loðnuvinnslunni h/f.

Í morgun kom færeyska skipið Finnur fríði FD 86 frá Götu til Fáskrúðsfjarðar með um 500 tonn af norsk-íslenskri síld. Löndun úr Finni hófst um hádegi, eftir að flutningaskipið Haukur hafði lestað 1200 tonn af fiskimjöli sem selt hefur verið til Noregs. Síldin verður unnin til manneldis og verður flökuð og söltuð.

Færeyska skipið Saksaberg FD 125 landaði um 275 tonnum af norsk-íslenskri síld á Fáskrúðsfirði s.l. laugardag. Síldin var flökuð og fryst hjá Loðnuvinnslunni h/f.

Tap af rekstri Loðnuvinnslunnar h/f á fyrsta ársfjórðungi 2006 nam kr. 71 millj. eftir skatta, samanborið við 90 millj. króna hagnað á fyrsta ársfjórðungi 2005 Tapið skýrist að verulegu leyti af neikvæðum fjármagnsliðum að fjárhæð kr. 224 millj. fyrst og fremst vegna lækkunar íslensku krónunnar, en fjármagnsliðir voru jákvæðir um kr. 32 millj. á þessum tíma árið áður. Þá tók félagið aðeins á móti 12 .þús. tonnum af loðnu í vetur miðað við 40 þús. tonn 2005.

Rekstrartekjur félagsins voru kr. 914 millj. og hækkuðu um 6% miðað við sama tíma árið 2005. Hagnaður fyrir afskriftir og fjármagnskostnað nam kr. 182 millj. eða 20% af tekjum og hækkaði um kr. 50 millj. frá fyrra ári. Veltufé frá rekstri var kr. 113 millj. eða 12% af tekjum og lækkaði um kr. 11 millj. frá fyrra ári. Afskriftir voru kr. 49 milljónir lækkuðu um 16%.

Eigið fé félagsins var í lok tímabilsins kr. 1.535 millj. sem er 43% af niðurstöðu efnahagsreiknings. Nettó skuldir Loðnuvinnslunnar voru kr. 1.227 millj. og höfðu hækkað um kr. 292 millj. einkum vegna kaupa félagsins á varanlegum aflaheimildum.

Eiríkur Ólafsson lætur af störfum hjá Kaupfélagi Fáskrúðsfirðinga og Loðnuvinnslunni h/f í lok maí n.k. Eiríkur hóf störf hjá Hraðfrystihúsi Fáskrúðsfjarðar h/f árið 1973 á vélaverkstæði. Hann var vélstjóri á Ljósafelli 1974-1981, en tók þá við starfi útgerðarstjóra. Árið 1994 var Eiríkur jafnframt ráðinn fulltrúi kaupfélagsstjóra og framkvæmdastjóra LVF. Eiríkur hóf eigin atvinnurekstur 1. apríl s.l., en hann hefur keypt Bílaverkstæði Borgþórs á Egilsstöðum, sem rekur einnig bílasölu og er m.a. með umboð fyrir Toyota á Austurlandi.

Við starfi Eiríks tekur Kjartan Reynisson sem starfað hefur hjá KFFB og dótturfyrirtækjum þess um 30 ára skeið og þar af á skrifstofum félaganna frá 1981-2005 er hann flutti til Akureyrar.