Loðnulöndun

Í dag er norska skipið Senior að landa um 400 tonnum af loðnu.

Loðnulöndun

Norska skipið Röttingöy landaði í gær um 500 tonnum af loðnu hjá LVF.

Loðnulöndun

Norska skipið Roaldsen kom til Fáskrúðsfjarðar í dag með um 650 tonn af loðnu.

Fyrsti kolmunninn

Í dag kom færeyska skipið Tróndur í Götu til Fáskrúðsfjarðar með um 2600 tonn af kolmunna og er þetta fyrsti kolmunnafarmurinn sem kemur til Loðnuvinnslunnar á árinu. Kolmunninn veiddist vestur af Írlandi og var skipið um 3 sólarhringa að sigla til Fáskrúðsfjarðar.

Loðnulandanir

Í gær landaði norski báturinn Havglans um 500 tonnum af loðnu hjá LVF og í dag verður landað úr Sjöbris um 600 tonnum.

Loðnulandanir

Norsku bátarnir Gerda Marie og Slaatteröy komu til Fáskrúðsfjarðar í gær með um 1100 tonn af loðnu og er loðnufrysting í fullum gangi hjá LVF þessa dagana.

Fyrsta loðnan til Fáskrúðsfjarðar

Fyrsta loðnan á þessari vertíð barst til Fáskrúðsfjarðar í gær þegar tveir norskir bátar Nordfisk og Gerda Marie lönduðu hér samtals um 700 tonnum. Hluti af aflanum fór í frystingu fyrir Austur-Evrópumarkað.

Myndina af Nordfisk tók Jónína Óskarsdóttir í gær.

Jólakveðja

Óskum starfsfólki okkar, viðskiptavinum, svo og landsmönnum öllum, gleðilegra jóla og farsældar á komandi ári, með þakklæti fyrir samstarfið á árinu sem er að líða.



Kaupfélag Fáskrúðsfirðinga og Loðnuvinnslan h/f

Árshátíð LVF 2006

Árshátíð Loðnuvinnlunnar hf verður haldin í Félagsheimilinu Skrúði laugardaginn 2. desember kl. 20.00. Samkoman hefst með borðhaldi, þar sem flutt verður skemmtidagskrá. Ómar Gunnarsson matsveinn á Hoffelli sér um veislumatinn að þessu sinni og er von á fjölbreyttum matseðli. Að loknu borðhaldi verður stiginn dans þar sem hljómsveitin Nefndin frá Egilsstöðum leikur og syngur. Um 170 manns hafa tilkynnt þátttöku í hátíðnni.

LVF óskar gestum sínum góðrar skemmtunar.

11.000 tunnur hjá LVF

Nú er búið að salta í um 11.000 tunnur af síld á haustvertíðinni hjá síldarverkun LVF. Saltað hefur verið í 9.600 tunnur af flökum og bitum og um 1.400 tunnur af heilli síld. Þessi framleiðsla hefur öll verið seld og fer hún til Svíþjóðar, Finnlands, Danmerkur og Kanada.

Hoffell er búið að veiða um 2.500 tonn af kvóta sínum og hefur síldin öll verið tekin í nót út af Austfjörðum. Síldin hefur verið mjög góð til vinnslu og hafa um 18% af henni verið yfir 350 gr. Veður hefur þó nokkuð hamlað veiðum í haust og frátafir vegna brælu verið tíðar. Hoffell á nú eftir að veiða um 1.800 tonn af síldarkvótanum.

Uppgjör LVF 1/1-30/9 2006

Tap af rekstri Loðnuvinnslunnar h/f fyrstu 9 máunði ársins 2006 nam kr. 68 millj. Þessi niðurstaða rekstrarreiknings ræðst fyrst og fremst af breytingum á gengi íslensku krónunnar, en fjármagnsliðir eru nú kr. 330 millj. hærri en á sama tíma árið 2005.


Rekstrartekjur félagsins að frádregnum eigin afla voru kr. 1.892 millj. og hækkuðu um 12% miðað við sama tímabil 2005. Hagnaður fyrir afskriftir og fjármagnsliði nam kr. 343 millj., sem er 18% af tekjum, en var kr. 90 millj. eða 5% af tekjum árið á undan. Veltufé frá rekstri var kr. 213 millj. eða 11% miðað við 3% á sama tíma í fyrra. Afskriftir voru kr. 146 millj., sem er svipað og árið áður.


Eigið fé félagsins var í lok tímabilsins kr. 1.539 millj., sem er 50% af niðurstöðu efnahagsreiknings. Nettó skuldir voru kr. 1.192 millj. og höfðu lækkað um liðlega 80 millj. á milli ára.


Afkoma félagsins á síðasta ársfjórðungi 2006 ræðst einkum af því hvernig síldarvertíðin gengur og af þróun á gengi íslensku krónunnar.

Uppgjör LVF 1/1-30/6 2006



Tap af rekstri Loðnuvinnslunnar h/f fyrstu 6 mánuði ársins 2006 nam kr. 67 millj. Þessi niðurstaða rekstrarreiknings ræðst fyrst og fremst af gengisbreytingu íslensku krónunnar, en fjármagnsliðir eru nú 383 millj. króna hærri en á sama tíma 2005.

Rekstrartekjur félagsins að frádregnum eigin afla voru kr. 1.653 millj. og hækkuðu um 17% miðað við sama tímabil 2005. Hagnaður fyrir afskriftir og fjármagnsliði (EBITDA) nam kr. 411 millj., sem er 25% af tekjum, en var kr. 159 millj. eða 11% árið á undan. Veltufé frá rekstri var kr. 290 millj. eða 18% af tekjum miðað við 9% á miðju ári 2005. Afskriftir voru kr. 97 millj. samanborið við kr. 115 millj. árið áður.

Eigið fé félagsins var í lok tímabilsins kr. 1.540 millj. sem er 46% af niðurstöðu efnahagsreiknings og hafði hækkað um kr. 61 millj. á milli ára. Nettó skuldir voru kr. 1.220 millj. og hækkuðu um kr. 245 miðað við sama tíma 2005.

Afkoma félagsins á síðari hluta ársins ræðst einkum af síldarvertíðinni í haust og þróun á gengi íslensku krónunnar.