Kolmunni
Tvö færeysk skip, Tróndur í Götu og Júpiter, lönduðu hér um helgina um 3000 tonnum af kolmunna.
Samkaup h/f
Samkaup h/f., Hafnargötu 62, 230 Keflavík, hefur nú tekið á leigu verslunarhúsnæði Kaupfélags Fáskrúðsfirðinga að Skólavegi 59, Fáskrúðsfirði, sem áður var í leigu hjá Kaupfélagi Héraðsbúa.
Hinir nýju rekstraraðilar eru boðnir velkomnir til Fáskrúðsfjarðar með góðum óskum um að rekstur þeirra megi verða farsæll.
Mikil ástæða er til þess að hvetja Fáskrúðsfirðinga til að taka vel á móti Samkaupum h/f og versla í heimabyggð og efla um leið byggðarlagið til framtíðar.
Verslum í heimabyggð – það borgar sig.
Hoffell SU 80
OLYMPUS DIGITAL CAMERA
Hoffell landaði í gær hjá Vinnslustöðinni hf í Vestmannaeyjum. Aflinn var 715 tonn af gulldeplu. Frá því að skipið hélt til þessara veiða þann 18. janúar hefur það fiskað 4.035 tonn af þessari tegund. Þetta er að sjálfsögðu góð búbót við önnur verkefni skipsins og má segja að vel hafi tekist til að ná tökum á þessum veiðiskap. Framundan er frekari þróun vegna hráefnisgæða, þ.e. geymslu og kælingar í lestum.
Gleðilegt nýtt ár 2009
Kaupfélag Fáskrúðsfirðinga og Loðnuvinnslan hf óska starfsfólki sínu, viðskiptavinum, svo og landsmönnum öllum, farsældar á nýju ári. Þökkum ánægjuleg samskipti á árinu sem er að líða.
Jólin 2008
Bestu óskir um gleðileg jól og farsæld á komandi ári. Þökkum samskiptin á árinu sem er að líða.
KFFB og LVF
Árshátíð LVF 2008
Árshátíð Loðnuvinnslunnar hf verður haldin í Félagsheimilinu Skrúði laugardaginn 13. des. n.k. Hátíðin hefst með borðhaldi kl. 20.00. Danshljómsveit Friðjóns Jóhannssonar leikur fyrir dansi.
Makríll í Breiðafirði
Þessi fiskur er ekki til eða hvað!!!!. Hann finnst allavega ekki í íslenskri lögsögu í veiðanlegu magni að mati Evrópusambandsins og Noregs og þau 110 þúsund tonn sem veiddust út af Austfjörðum í sumar voru alger tilviljun. Alltaf berast þó fréttir af makríl hér og þar og þessi makríll á myndinni kom í nótina hjá Hoffelli SU 80 við síldveiðar fyrir vestan, nánar tiltekið í Breiðafirði. Makríllinn og félagar hans sem hafa þá væntanlega komið ólöglega til landsins voru „gómaðir“ og landað á Fáskrúðsfirði.
Norsk-ísl. síld
Færeyska skipið Tróndur í Götu kom til Fáskrúðsfjarðar í gær með um 2300 tonn af norsk-ísl. síld. Skipið var um tvo og hálfan sólarhring á leið sinni til Fáskrúðsfjarðar. Síldinni var landað í bræðslu hjá LVF.
Norsk- íslensk síld
Í gærkvöldi kom Tróndur i Götu til Fáskrúðsfjarðar með um 2000 tonn af norsk-ísl. síld og Finnur Fríði lagðist hér að bryggju í morgun með um 2.200 tonn af norsk-ísl. síld. Síldin fer öll í bræðslu hjá LVF.
KFFB 75 ára
Kaupfélag Fáskrúðsfirðinga er 75 ára í dag, en það var stofnað 6. ágúst 1933. Í fyrstu stundaði félagið eingöngu verslunarrekstur, en fiskverkun hófst þó fljótlega og útgerð á vegum félagsins hófst árið 1953. Kaupfélagið hefur um áratuga skeið verið langstærsti atvinnurekandinn á Fáskrúðsfirði og ávallt staðið fyrir fjölbreyttri atvinnustarfsemi. Frá 1. janúar 2002 hefur félagið verið rekið sem eignarhaldsfélag og rekstri þess komið fyrir í hlutafélaginu Loðnuvinnslunni h/f. Eignarhlutur kaupfélagsins í Loðnuvinnslunni h/f er nú um 83%. Hjá Loðnuvinnslunni störfuðu á síðasta ári um 150 manns að meðaltali.
Félagar í Kaupfélagi Fáskrúðsfirðinga eru um 190 talsins.
Norsk-ísl. síld
Færeyska skipið Carlton er að landa um 170 tonnum af síld hjá LVF. Síldin fer í bræðslu.
Sigling á sjómannadag
Að venju munu skip Loðnuvinnslunnar hf., Hoffell og Ljósafell, fara í siglingu í tilefni sjómannadagsins. Siglt verður kl 13:00 laugardaginn 31. maí. Svo skemmtilega vill til að þann dag eru liðin 35 ár frá því að Ljósafell SU 70 kom til Fáskrúðsfjarðar, en það lagðist hér fyrst að bryggju 31. maí 1973 eftir 6 vikna siglingu frá Japan. Skipið var lengt og endurbyggt 1988/1989 í NAUTA-skipasmíðastöðinni í Gdynia í Póllandi og 2007/2008 var það endurbyggt á ný í ALKOR-skipasmíðastöðinni í Gdansk í Póllandi. Fáskrúðsfirðingum og öðrum gestum býðst nú tækifæri til að skoða skipið eftir breytingarnar, en sökum mikilla verkefna hefur almenningi ekki verið gefinn kostur á því fyrr en nú. Loðnuvinnslan hf óskar sjómönnum og fjölskyldum þeirra innilega til hamingju í tilefni sjómannadagsins.