Hagnaður LVF 90 milljónir

Hagnaður Loðnuvinnslunnar h/f á fyrsta ársfjórðungi 2005 nam kr. 90 millj. eftir skatta, en var kr. 55 millj. á sama tíma árið 2004.

Rekstrartekjur félagsins voru kr. 860 millj. og hækkuðu um 8% miðað við fyrsta ársfjórðung 2004. Hagnaður fyrir afskriftir og fjármnagnsliði nam kr. 132 millj. eða 15% af tekjum og veltufé frá rekstri var kr. 124 millj. eða 14% af tekjum. Afskriftir voru kr. 58 millj. og höfðu hækkað um 6%. Fjármagnsliðir voru jákvæðir um kr. 32 millj., en voru neikvæðir um kr. 26 millj. á sama tíma fyrir ári.

Eigið fé félagsins var í lok tímabilsins kr. 1.541 millj., sem er 47% af niðurstöðu efnahagsreiknings og hækkaði um kr. 45 millj. á milli ára. Nettó skuldir Loðnuvinnslunnar voru kr. 935 millj. og hækkuðu um kr. 19 millj. á síðustu 12 mánuðum.

Fyrstu þrjá mánuði ársins tók Loðnuvinnslan á móti 42.000 tonnum af loðnu og 10.000 tonnum af kolmunna, frysti 820 tonn af loðnu fyrir Japansmarkað og 350 tonn af loðnuhrognum, auk hefðbundinnar bolfiskframleiðslu og eftirflökunar á saltsíld.

65 þúsund tonn

Starfsmenn í fiskimjölsverksmiðju Loðnuvinnslunnar hf héldu upp á það í gær að vera búnir að taka á móti 65 þúsund tonnum af hráefni frá áramótum. Verksmiðjan hefur tekið á móti 42 þúsund tonnum af loðnu og 23 þúsund tonnum af kolmunna. Á myndinni eru Magnús verksmiðjustjóri, Árni vaktformaður og hans ekta kvinna Linda, sem vinnur á skrifstofu LVF en hlýtur að hafa frétt af tertuátinu og skroppið í kaffi út í verksmiðju.

Taits landar kolmunna

Skoska skipið Taits FR 227 er að landa um 1000 tonnum af kolmunna á Fáskrúðsfirði. Aflann fékk skipið í lögsögu Færeyja.

Mikil kolmunnaveiði suður af Færeyjum.

Jupiter FD 42 frá Götu er að landa 2000 tonnum af kolmunna, þá eru væntanlegir á morgun til Fáskrúðsfjarðar bæði Hoffell og skoski báturinn Conquest með fullfermi, samtals 2500 tonn.

Fyrst kvenna

Það bar til tíðinda í morgun hjá LVF að kona mætti á vakt í fiskimjölsverksmiðjunni. Hún heitir Alberta Guðjónsdóttir og mun vera fyrst kvenna á Fáskrúðsfirði til að hefja störf við sjálfa framleiðsluna. Konur hafa hins vegar starfað um árabil á rannsóknarstofunni og við ræstingar hjá verksmiðjunni. Mikil gleði ríkti í morgun á meðal starfsmannanna yfir því að fá kattþrifna konu í hópinn. Velkomin Alberta.

Kolmunni úr lögsögu Færeyja.

Finnur Fríði landaði 2408 tonnum af kolmunna í gær og nótt. Hoffell er væntanlegt í fyrramálið með 1200 tonn af kolmunna. Kolmunninn veiðist nú syðst í lögsögu Færeyja við miðlínu Skotlands og Færeyja.

Hans Óli ráðinn til LVF

Hans Óli Rafnsson hefur verið ráðinn til LVF og mun m.a. hafa umsjón með tölvuvinnslu og launaútreikningum hjá félaginu. Hann tekur við starfinu af Kjartani Reynissyni, sem gegnt hefur því í 24 ár.

Hans Óli er fæddur á Fáskrúðsfirði 31. júlí 1966 og ólst þar upp. Hann lauk prófi í rafeindavirkjun árið 1993. Hann starfaði hjá Skiparadio 1993-1996 og síðar hjá Eltak. Hann hefur að undanförnu starfað sem verktaki hjá Voga- og mælitækni í Reykjavík og unnið við uppsetningar á tölvuvogum og tölvustýringum.

Kona hans er Berglind Agnarsdóttir, leikskólastjóri, og eiga þau tvö börn, Ellen Rós f. 1991 og Unnar Ara f. 1997. Hans Óli mun hefja störf hjá LVF 9. maí n.k.

Aðalfundur KFFB

Aðalfundur Kaupfélags Fáskrúðsfirðinga var haldinn á Hótel Bjargi föstudaginn 8. apríl kl. 17.30.

Hagnaður KFFB skv. samstæðureikningi nam kr. 29,5 millj., en eigið fé þess var kr. 1.346 millj. sem er 95,7% af niðurstöðu efnahagsreiknings.

Auk venjulegra aðalfundarstarfa var samþykkt að leggja niður innlánsdeild félagsins miðað við 15. apríl 2005. Þá var ákveðið að fækka félagsdeildum úr fjórum í tvær fyrir aðalfund 2006.

Kjartan Reynisson sem verið hefur í stjórn KFFB frá 1993 og stjórnarformaður frá 1997 gaf ekki kost á sér til áframhaldandi stjórnarsetu og var Jónína Óskarsdóttir kjörin í hans stað. Stjórnin hefur skipt með sér verkum:

Steinn B. Jónasson, formaður, Elvar Óskarsson, varaformaður, Elínóra Guðjónsdóttir, ritari, Lars Gunnarsson og Jónína Óskarsdóttir meðstjórnendur. Í varastjórn eru Smári Júlíusson, Ármann Elísson og Magnús Ásgrímsson.

Aðalfundur LVF

Aðalfundur Loðnuvinnslunnar h/f var haldinn á Hótel Bjargi föstudaginn 8. apríl 2005 kl. 18.30.

Niðurstöður ársreiknings LVF hafa þegar verið birtar, en hagnaður LVF eftir skatta nam kr. 50,7 millj. króna. Tekjur félagsins námu kr. 2.232 millj.og eigið fé var kr. 1.486 millj. sem er 50% af niðurstöðu efnahagsreiknings.

Aðalfundurinn samþykkti að greiða 5% arð til hluthafa.

Stjórnin var öll endurkjörin og hefur skipt með sér verkum: Friðrik M. Guðmundsson, formaður, Lars Gunnarsson, varaformaður, Kjartan Reynisson, ritari, Steinn B. Jónasson og Elvar Óskarsson meðstjórnendur. Í varastjórn eru: Jóhannes Sigurðsson og Björn Þorsteinsson.

Aðalfundir 2005

Aðalfundur Kaupfélags Fáskrúðsfirðinga verður haldinn á Hótel Bjargi föstudaginn 8. apríl 2005 kl. 17.30.

Aðalfundur Loðnuvinnslunnar h/f verður haldinn á Hótel Bjargi föstudaginn 8. apríl 2005 kl. 18.30.

Sameiginlegur kvöldverður að loknum aðalfundunum.

Tróndur landar

Færeyska skipið Tróndur í Götu kom til Fáskrúðsfjarðar í gærkvöldi með um 2600 tonn af kolmunna, sem skipið fékk nálægt miðlínu suður af Færeyjum.

Kolmunni streymir að landi.

Skoski báturinn Taits landaði 1235 tonnum af kolmunna í morgun. Von er á norskum bát í kvöld með 1800 tonn og á morgun kemur annar skoskur bátur með 1400 tonn.