Fyrsti kolmunninn

Fyrsti kolmunninn sem hingað berst til lands á árinu kemur til Fáskrúðsfjarðar í dag. Það er færeyska skipið Finnur Fríði sem kemur til Fáskrúðsfjarðar um kl. 12.30 með 2300 tonn, sem veiddust vestur af Írlandi. Finnur Fríði er nýtt skip, sem kom til heimahafnar í Færeyjum 20. desember s.l. og er þetta þriðja veiðiferð skipsins. Skrokkur skipsins var byggður í Rúmeníu, en var svo dreginn til Noregs um mánaðarmótin ágúst-september 2003, þar sem skipið var klárað. Skipstjóri á Finni Fríða er Arne Hansen, sem áður var með Trónd í Götu, skip sömu útgerðar. Útgerðarmaður skipanna er Jákup Jacobsen í Götu í Færeyjum.

Myndin er tekin er Finnur Fríði kom til heimahafnar í desember s.l. Tróndur í Götu er í baksýn

Japansfrysting á loðnu hafin.

Byrjað var að frysta loðnu fyrir Japansmarkað í morgun, en þótt hrognafylling sé ásættanleg er loðnan frekar smá. Verið er að landa úr norska bátnum Torbas u.þ.b. 450 tonnum.

Loðnulöndun

Norski loðnubáturinn Nordfisk kom til Fáskrúðsfjarðar í morgun með um 500 tonn af loðnu.

Loðnuvertíð

Það sem af er árinu hefur Loðnuvinnslan h/f tekið á móti tæplega 5000 tonnum af loðnu og af því hafa verið fryst um 1400 tonn til landa Austur-Evrópu. S.l.sunnudag 1. febrúar lestaði m/s Ice Crystal liðlega 600 tonn af frystri loðnu.


Hinn 26. janúar lestaði m/s Sylvia 1400 tonn af fiskimjöli og n.k. föstudag er væntanlegt hingað m/s Delmar og lestar um 800 tonn af mjöli.

Fryst á vöktum hjá LVF

Undanfarna daga hefur verið mjög mikið að gera við loðnufrystingu hjá LVF og búið að frysta um 1000 tonn frá því á laugardag. Norska loðnuskipið Rav landaði í gær um 400 tonnum af loðnu og fór meirihluti aflans í frystingu. Skipverjar á Ljósafelli bættust í vikunni í hóp þess vaska fólks sem vinnur við frystinguna.

Aflahæstu hafnir 2003

Skv. síðasta tölublaði Fiskifrétta eru aflahæstu hafnir landsins 2003 þessar:



1. Neskaupstaður 256.000 tn.

2. Vestmannaeyjar 198.000 tn.

3. Eskifjörður 171.000 tn.

4. Seyðisfjörður 150.000 tn

5. Grindavík 148.000 tn.

6. Fáskrúðsfjörður 129.000 tn.

7. Akranes 121.000 tn.

8. Reykjavík 115.000 tn.

9. Akureyri 99.000 tn.



Ef íbúafjölda þessara byggðarlaga er deilt í aflatölurnar og fundinn út afli á íbúa er röðin þessi:

1. Fáskrúðsfjörður 200 tn. pr. íbúa

2. Seyðisfjörður 198 tn. pr. íbúa

3. Neskaupstaður 183 tn. pr. íbúa

4. Eskifjörður 171 tn. pr. íbúa

5. Grindavík 62 tn. pr. íbúa

6. Vestmannaeyjar 45 tn. pr. íbúa

7. Akranes 22 tn. pr. íbúa

8. Akureyri 6 tn. pr. íbúa

9. Reykjavík 1 tn. pr. íbúa

Loðnufrysting

Loðnufrysting hófst hjá LVF laugardaginn 24. janúar, en þá kom Hoffell með um 600 tonn. Fryst var í báðum frystihúsum LVF þ.e.a.s. í frystihúsinu á Fiskeyri og frystihúsinu Fram. Í dag er Víkingur AK að landa um 700 tonnum af loðnu og frysting hafin. Starfsfólk vantar tilfinnanlega í vinnu við loðnufrystingu á Fáskrúðsfirði.

Myndin er tekin af loðnuflokkun í dag.

Góðri síldarvertíð lokið.

Síldarvertíðinni er lokið á þessari haustvertíð. Búið er að taka á móti 10.750 tonnum og salta í 23.000 tunnur og frysta 500 tonn af flökum annað hefur farið í bræðslu. Hoffell var að landa 115 tonnum og er að útbúa sig á loðnu. Það er eins með síldina núna og áður að erfitt er að treysta henni. Í haust hefur stór síld nánast ekki látið sjá sig en aftur á móti hefur verið mikið af 4ra ára síld sem er 28 til 30 cm löng. Af þessu leiðir að erfitt hefur verið að fylla upp í samninga þar sem hefur þurft að nota stóra síld. Við sem við þetta vinnum spáum auðvitað í það hvar demant síldin sé, sumir segja að hún sé dreifð með öllum landgrunnskantinum og sé bara ekki í veiðanlegu ástandi.

Ef maður lætur hugann reika aftur í tíma í kringum 1968-1969 þá hvarf Suðurlandssíldin svokallaða og var algjört veiðibann í nokkur ár eftir það. Á sama tíma bar það svo við að góð síldveiði hófst í Norðursjónum og þar stunduðu íslensk skip síldveiðar til ársins 1974 eða 1975. Nú er sama ástand í Norðursjónum allt fullt af síld, er eitthvað samband þarna á milli ? Svo spyr maður sig að þegar síldin við Vestamannaeyjar var búin að hrygna í hitteðfyrra og fór þaðan, að á sama tíma tekur einn þekktur hvalur stefnuna til Noregs, hvað var Keikó heitinn að elta þegar hann tók strauið til Noregs ? E.Ó.


Met í síldarsöltun

Aldrei hefur verið saltað jafn mikið af síld hjá LVF síðan byrjað var á þessari verkun fyrir 7 árum. Í dag er búið að salta í 21.000 tunnur, þar af eru 15.000 tunnur af flökum og bitum, en 6.000 tunnur er hausskorið og heilsaltað. Einnig er búið að frysta 500 tonn af flökum, sem að mestu fara á Frakkland og Eystrasaltslöndin. Saltaða síldin fer að mestu á Norðurlöndin og einnig lítillega til Kanada. Mikil vinna hefur verið í haust og það sem af er janúar í kringum síldina og aðra fiskverkun hjá Loðnuvinnslunni h/f. Myndin hér til hliðar er tekin í haust við móttöku á tómum síldartunnum.

Síld og Hjónaball

Verið er að salta og flaka síld sem Hoffell kom með í morgun. Skipið kom með um 500 tonn og verður unnið við það fram eftir degi, en þá verður tekið hlé fram yfir hádegi á morgun, því árlegt “hjónaball” verður haldið í Skrúð í kvöld. Vinnan verður að víkja í smá stund fyrir þessum ríflega 100 ára gamla sið Fáskrúðsfirðinga. Mikið fjölmenni verður á hátíðinni í kvöld, þar sem hjónafólki frá Stöðvarfirði er heimil þátttaka eftir sameiningu Búða- og Stöðvarhrepps í Austurbyggð. Bæði skip Loðnuvinnslunnar h/f verða í höfn svo að þeir sem þar eiga maka geti tekið þátt í hátíðinni.

Vinnsla hafin

Ljósafell kom til löndunar í gærmorgun með tæplega 50 tonn af fiski, aðallega þorski, og hófst þegar í stað vinnsla í frystihúsi félagsins. Hoffell kemur til löndunar í fyrramálið með síld sem verður flökuð og söltuð. Búið er að salta í rúmlega 17000 tunnur á síldarvertíðinni í haust, sem mest er flök og bitar.

Jólakveðja

Loðnuvinnslan h/f óskar starfsfólki sínu, hluthöfum, viðskiptavinum, svo og landsmönnum öllum gleðilegra jóla og farsældar á komandi ári. Þökkum samstarfið á árinu sem er að líða.