Nóg hefur verið að gera hjá starfsmönnum Fiskmjölsverksmiðju Loðnuvinnslunnar.  Það sem af er ári hefur Loðnuvinnslan tekið á móti 43.000 tonnum af loðnu, kolmunna og síld. Á ný aflokinni loðnuvertíð tók LVF á móti 37.000 tonnum af loðnu. Hoffell Su 80 landaði 11.500 tonnum en hinn aflinn kom frá norskum og færeyskum skipum sem lönduðu hér á Búðum.  28.000 tonn af þessum afla fór í bræðslu þar sem unnið er úr hráefninu mjöl og lýsi.

Við sögðum frá því í desember s.l þegar nýr þurrkari var settur upp í verksmiðjunni.  Nú eru þar þrír þurrkarar sem hafa haft nóg fyrir stafni við að þurrka allan þann afla sem farið hefur í gegn um verksmiðjuna.

Magnús Ásgrímsson er verksmiðjustjóri Fiskmjölsverksmiðjunnar og var snöggur til svars þegar hann var inntur eftir því hvernig loðnuvertíðin hefði gengið í bræðslunni: „Djöfull vel“.  Hann sagði líka að nýi búnaðurinn hefði staðið allar væntingar og reynst afar vel.

Magnús sagði að framan af vertíð hefði mikill hluti aflans farið í flokkun og frystingu og þá hefði verið skaplegt að gera hjá starfsmönnum verksmiðjunnar, en síðan hefði allt farið á fullt þegar farið var að „kútta“ , þ.e. þegar loðnan er skorin og fleytt í gegn um þar til gerða skilvindu þar sem hrognin fljóta frá og restin af fiskinum fer í bræðslu. „Þá var svo mikið að gera að við gátum ekki stoppað tækin til þess að líta yfir þau og hreinsa, en þau stóðu þetta allt af sér, sem og mannskapurinn sem hefur unnið mikið þessa dagana“.  30.000 tonn af loðnu voru skorin í hrogn á þessari vertíð á móti 15.000 tonnum í fyrra sem segir sína sögu um annríkið og verðmætsköpunina sem átt hefur sér stað hjá Loðnuvinnslunni undan farnar vikur.

Fannfergið sem við Austfirðingar fengum í lok mars mánaðar og asa hlákan í kjölfarið situr í okkur þannig að veðrið verður okkur enn tamara umræðuefni en oft áður. 

Þegar Magnús var spurður hvort að veður hefði gert starfsfólki verksmiðjunnar lífið leitt við störf sín svaraði hann því til að  í fyrstu vikunni  hefði verið mjög gott veður, síðan fór að kólna sem varð að hörkufrosti síðan kom snjórinn sem gerði starfsfólki verksmiðjunnar erfitt fyrir eins og öðrum. „Sérstaklega þegar við þurfum að koma mjölsekkjum á milli húsa“ sagði Magnús.

Mjöl og lýsi er mikilvæg afurð sem notuð er í dýrafóður.

BÓA

Það er ekki alltaf tap að vera síðastur, og sú staðreynd sannaðist þegar Hoffell  SU 80 kom úr síðasta loðnutúrnum. Skipið kom í heimahöfn þann 25.mars,  seinast allra skipa af miðunum með 1800 tonn af loðnu í hrognatöku. Þá hefur Hoffell náð öllum sínum kvóta eða 11.500 tonnum, og úr þeim hafa náðst 2000 tonn af hrognum og er það einsdæmi að svo mikið magni af hrognum hafi fengist úr afla eins skips.

Sigurður Bjarnason skipstjóri á Hoffelli var að vonum ánægður með vertíðina. „Við náðum öllum okkar kvóta og það var frábært“ sagði hann og hafði orð á því að veðrið á miðunum hefði verið afar hagstætt. Engin bræla að spilla fyrir veiðum.  Og í ljósi þess að Hoffell hóf sínar loðnuveiðar frekar seint, eða í lok febrúar, þá verður árangurinn stærri.

Vertíðir af þessu tagi kalla á heilmikið úthald og þá er mikilvægt að hafa góðan mannskap til að vinna verkin og Sigurður skipstjóri er mjög sáttur við sína menn. „Þetta er hörkuáhöfn og stendur sig alltaf vel“ sagði hann.

Næsta verkefni Hoffells er að fara á kolmunna veiðar.

BÓA

Á árum áður var gjarnan talað um bjargræðistíma þegar annríki var mikið við að færa björg í bú hvort heldur var til sjávar eða sveita.  Í sjávarútvegi kemur annríkið með vertíðunum sem skipa sér hver á eftir annarri eftir því sem fiskar af hinum ýmsu tegundum synda inn og út af veiðisvæðum. Einum slíkum annríkistíma er rétt lokið hjá Loðnuvinnslunni og er það loðnuvertíðin.  Met voru slegin og markmiðum náð og er það ávallt fagnaðarefni.

Loðnuvinnslan tók á móti 37.000 tonnum af loðnu. 28.000 tonn fóru í bræðslu, 3700 tonn voru heilfryst á markaði í Asíu og Úkraníu og 5300 tonn af hrognum var unnið úr þessum afla og er LVF stærsti einstaki framleiðandi hrogna á Íslandi.

Loðnuhrogn eru afar verðmæt afurð og því skiptir miklu máli að meðhöndla þau af fagmennsku svo að úr verði vara sem er eftirsótt um heim allan.

Þorri Magnússon er framleiðslustjóri Loðnuvinnslunnar og sér til þess að öll framleiðsla á þessum verðmætu matvælum fari fram eins og til er ætlast.

Er Þorri var spurður að því hvernig vertíðin hefði gengið svaraði hann:

„Það er fátt hægt að segja annað en að starfsmenn til sjávar og lands unnu þrekvirki á þessari vertíð eins og oft áður, stoðdeildir og verktakar tryggðu að allt gekk smurt. Það unnu allir að einu markmiði að gera mikið og það tókst“.

Þorri vildi líka þakka þeim er héldu opnum götum í þorpinu, því að undan farið hefur verið mikið fannfergi á Austfjörðum,  sem síðan varð að heilmiklum krapa svo að færð innan þorpsins spilltist mjög auðveldlega.  „Þeir eiga skilið þakkir fyrir frábært starf“ sagði Þorri og hinn almenni borgari hér á Búðum getur tekið heilshugar undir það.

Nýja frystikerfi í Fram stóð allar væntingar og sagði Þorri að „ýtt hefði verið á græna takkann í upphafi vertíðar og þann rauða við lok, hreint frábær búnaður“.

En það eru ekki aðeins vélar og búnaður sem stóðu sig vel því mannshöndin og mannhugurinn þarf að vera til staðar líka og vel við hæfi að enda á orðum Þorra framleiðslustjóra sem sagði stoltur: „Það er eins og áður við erum með frábæran mannauð“.

BÓA

Tasiilaq kom inn í nótt með 1.400 tonn af Loðnu til hrognatöku. Aflinn er fenginn út af Malarrifi á Snæfellsnesi.