Ljósafell

Ljósafell er nú að landa um 40 tonnum eftir stuttan túr og er uppistaðan þorskur. Skipið heldur aftur á veiðar að löndun lokinni kl. 13:00 í dag.

Ljósafell

Ljósafell landaði í gær um 75 tonnum. Uppistaða aflans var þorskur til vinnslu í frystihúsi LVF. Skipið heldur aftur til veiða í dag, þriðjudaginn 6. nóvember kl. 13:00.

Ljósafell

Ljósafell er nú að landa um 50 tonnum eftir tvo daga á veiðum. Aflinn er nánast eingöngu þorskur. Skipið fer aftur á veiðar að löndun lokinni um kl 14:00 í dag.

Starfsmannafélagið á faraldsfæti

Steinþór Pétursson og Guðný Elísdóttir
Hjálmar Heimisson og Kristín Hanna Hauksdóttir

Um nýliðna helgi fór Starfsmannafélag Loðnuvinnslunnar til Gdansk í Póllandi. Flogið var frá Egilsstöðum fimmtudaginn 25.október og heim aftur mánudaginn 29.október. Voru um það bil 90 manns með í för, félagsmenn og makar.  Gdansk tók vel á móti ferðalöngum, veðrið var þokkalegt haustveður og borgin heilsaði hlýlega.

Hjónin Kristín Hanna Hauksdóttir og Hjálmar Heimisson eru bæði í Starfsmannafélaginu og að auki er Kristín Hanna í stjórn Starfsmannafélagsins og kom að skipulagningu og undirbúiningi fararinnar.  Aðspurð sögðu Kristín Hanna og Hjálmar að þetta væri fyrsta ferðin þeirra til Póllands og það hefði komið þeim skemmtilega á óvart hversu hrein og falleg borgin reyndist vera. Þau höfðu orð á því hvað byggingastíll borgarinnar væri fallegur og sér í lagi í gamla bænum þar sem falleg og reisuleg hús umlykja torgið.  “Við fórum líka í kirkjuna Oliwa þar sem leikið var á orgelið og það var rosalega flott” sögðu þau Kristín Hanna og Hjálmar.  En orgelið sem um ræðir skartar tæplega átta þúsund pípum ýmist úr tini eða tré, þar sem minnsta pípan er á stærð við eldspýtustokk en sú stærsta er 10 metra löng.

Steinþór Pétursson og Guðný Elísdóttir voru í sinni fyrstu ferð með Starfsmannafélaginu og þegar greinarhöfundur króaði þau af við morgunverðarborðið  tóku þau vel í stutt spjall.  “Þetta er búið að vera góð ferð” sögðu þau hjónin og bættu því við að þau hefðu komið með “galopinn hugann” því þau hefðu ekki haft neinar fyrir fram ákveðnar hugmyndir um Pólland.  Þau höfðu einnig orð á því að borgar umhverfið allt væri vinalega og viðmót heimamanna huggulegt.  Þegar þau Guðný og Steinþór voru innt eftir því hvort að eitthvað hefði staðið uppúr í ferðnni nefndu þau safnið um seinni heimstyrjöldina (Museum of the Second World War – Muzeum II Wonjy Swiatowej) sem er á heimsmælikvarða sambærilegra safna, eftir því sem ferðamannahandbækur upplýsa. “Svo höfum við haft það eins og fólk gerir gjarnan í útlöndum, gengið um götur, kíkt í búðir og borðað mikið af góðum mat” sögðu þau Steinþór og Guðný.

Á sunnudagskvöldinu bauð Loðnuvinnslan öllum í mat. Veitingahúsið sem varð fyrir valinu var í fallegu gömlu húsi og þar var boðið uppá góðan mat og afar fallega fram borin. Síðan var tækifæri á mánudagsmorgni til að hlaupa í verslanir og sækja það sem uppá vantaði, fá sér gönguferð í bæinn, setjast á veitingahús eða bara kúra frameftir áður en haldið var heim á leið eftir vel heppnaða ferð til Gdansk í Póllandi.

BÓA

Heilsufarsskoðanir

Sonja Gísladóttir

Undanfarna tvo daga hafa staðið yfir heilsufarsskoðanir fyrir starfsfólk Loðnuvinnslunnar.  Er það fyrirtækið Liðsemd, sem er í eigu Sonju Gísladóttur hjúkrunarfræðings, sem hefur framkvæmt skoðanirnar.  „Heilsufarsskoðununum skiptum við í tvennt, þ.e. skoðun fyrir starfsfólk sem er 40 ára og eldra og fer sú skoðun annars vegar fram hjá hjúkrunarfræðingi sem sér, meðal annars, um mælingar á blóðþrýstingi, blóðsykri, kólesteróli og heildar blóðmagni í líkamanum  og hins vegar hjá lækni sem  athugar  með heyrn og sjón, bregður hlustarpípu að brjósi og athugar með stoðkerfi.  Að auki svarar fólk spurningarlista þar sem spurt er um andlega og líkamlega líðan.  Að skoðun lokinni fær fólk ráðleggingar í samræmi við niðurstöðu skoðanna ef við á“ svaraði Sonja aðspurð um framkvæmd heilsufarsskoðanna. Síðan er boðið uppá skoðun fyrir starfsfólk 40 ára og yngra og er sú þjónusta framkvæmd eingöngu af hjúkrunarfræðingi þar sem algengt er að yngra fólk sé heilsuhraustara en þeir sem eldi eru.

Liðsemd bíður uppá allskyns þjónustu er tengist heilsu og vinnuverndarmálum.  „Ég tek að mér allkyns verkefni sem tengjast heilsu“ segir Sonja „Ég bíð uppá mismunandi  heilsufarsskoðanir,  ýmist er um almennar skoðanir að ræða sem krefjast aðeins aðkomu hjúkrunarfæðings eða ýtarlegri skoðanir sem krefjast aðkomu bæði hjúkrnunarfæðings og læknis og fæ ég þá lækni til liðs við mig og að þessu sinni var það Fjölnir Guðmannsson sem vann með mér að skoðunum á  starfsfólki Loðnuvinnslunnar.  Svo bíð ég uppá  bólusetningar og skyndihjálpar námskeið“ bætti Sonja við.

Til gamans má geta þess að Fjölnir Guðmannsson er ættaður frá Brimnesi við Fáskrúðsfjörð.

Heilsufarsskoðanir fyrir 40 ára og yngri fara svo fram á næstu vikum þannig að allt starfsfólk Loðnuvinnslunnar, sem þiggur boð um skoðun,  ætti að vera búið að fá upplýsingar um heilsufar sitt fyrir jól.

BÓA

 

Góðir gestir í kaffi

Ljósmynd: Kjartan Reynisson
Ljósmynd: Kjartan Reynisson

„Sælt er að eiga sumarfrí

sveimandi út um borg og bí

syngjandi glaður aka í

óbyggðaferð í hópi“.

Þessar textalínur eftir Ómar Ragnarsson komu upp í hugann þegar greinarhöfundur sá myndir af stæðilegum jeppum félaga í Ferðaklúbbnum 4X4 á Austurlandi en laugardaginn 13.október s.l. bauð Ferðaklúbburinn skjólstæðingum Félagsþjónustunnar í Fjarðabyggð og á Héraði í árlega jeppaferð. Voru 8 bílar með í ferðinni sem fluttu um 30 ánægða  og syngjandi glaða farþega.  Er ferðalag af þessu tagi árlegur viðburður. “ Þetta eru alltaf mjög skemmtilegar og sama fólkið kemur aftur og aftur“ sagði Sigurður Kári Samúlesson skipuleggjandi ferðarinnar í ár, og bætti því við  að þetta hefði líklegast verið tíunda ferðin sem Ferðaklúbburinn 4X4 á Austurlandi bíður einstaklingum sem ekki eiga þess kost sjálfir að aka stórum breyttum jeppum.   „Við ókum sem leið lá frá Egilsstöðum inn Skriðdalinn, tókum þá Þórdalsheiðina niður í Reyðarfjörð. Þaðan ókum við svo á Fáskrúðsfjörð þar sem öllum hópnum var boðið í kaffi á vegum Loðnuvinnslunnar. Veitingarnar voru hrikalega flottar og allir voru mjög ánægðir“ sagði Sigurður Kári.  Ferðalangarnir fengu dásamlegt veður til fararinnar sem gerir upplifunina enn betri og sagði Sigurður Kári að allir hefðu verið í skýjunum að ferðalokum.

BÓA

 

Ljósafell

Ljósafell er nú að landa á Dalvík. Aflinn er um 25 tonn. Þá hefur skipið lokið við 128 stöðvar af þeim 179 sem áætlað er að taka. Brottför frá Dalvík kl 14:00 að löndun lokinni.

Hoffell

Hoffell kom til löndunar í gær með um 500 tonn af síld til söltunar og frystingar. Auk þess var skipið með smá slatta af kolmunna, eða um 150 tonn. Skipið fer aftur á veiðar að löndun lokinni og reynir fyrir sér í kolmunna.

Gjafir til Uppsala

Í dag færði Kaupfélagið dvalarheimilinu Uppsölum góðar gjafir.  Annars vegar var um að ræða svo kallaðan blöðruskanna sem notaður er til þess að óma þvagblöðrur í þeim tilgangi að kanna hvort að þær tæmist við þvaglát,  og hins vegar gasgrill.  Elín Hjaltalín Jóhannesdóttir hjúkrunastjóri og Ragnar Sigurðsson framkvæmdastjóri hjúkrunarheimilanna í Fjarðabyggð tóku á móti gjöfunum fyrir hönd Uppsala.  Aðspurð um mikilvægi þess fyrir Uppsali að eiga blöðruskanna svaraði Elín að það væri afar mikilvægt. Þannig vill nú til að þegar mannfólk eldist gengur oft á tíðum erfiðlega að tæma þvagblöðruna og eykst þá hættan við blöðrubólgu og aðra erfiðleika sem geta valdið alvarlegum veikindum.  Áður þurfti að senda heimilisfólk á Neskaupsstað til þess að gangast undir þessa einföldu ómun, og er það heilmikil fyrirhöfn fyrir þá sem eru orðnir ferðalúnir, og þess vegna sé það afar mikilvægt að tækið sé fyrir hendi hér heima.

Ragnar þakkaði Kaupfélaginu kærlega fyrir góðar gjafir og stuðning í gegnum árin, hann sagði það ómetanlegt fyrir Uppsali að eiga svo góðan bakhjarl sem Kaupfélag Fáskrúðsfirðinga hefur reynst.  Þá hafði hann orð á því að þó svo haustið væri komið og vetur á næsta leiti væri ekki úr vegi að grilla  eitthvað góðgæti við tækifæri en var þess fullviss að grillið kæmi að góðum notum næsta sumar.

Að lokum var heimilisfólki og gestum boðið uppá kaffi og meðlæti til þess að fagna þessum góðu gjöfum.

BÓA

Ljósafell

Ljósafell kom til löndunar á Ísafirði í morgunn með um 35 tonn. Þá eru búnar 65 stöðvar af 179 í Togararalli Hafró á grunnslóð þetta árið. Skipið heldur áfram með verkefnið að löndun lokinni.

Hoffell aflahæst á makríl

 

Hoffell er á landleið með tæp 700 tonn af makríl. Þegar þeim afla hefur verið landað hefur Hoffell komið með 10.000 tonn að landi og er þar með aflahæst íslenskra skipa á sömu veiðum.  Bergur Einarsson skipstjóri kvaðst aðspurður vera þakklátur fyrir góða vertíð og sagði ástæðu velgenginnar vera sú að vinnslan í landi og veiðarnar hefðu gengið vel og einnig að veðrið hefði verið afar hagstætt.

Næst fer Hoffell á síldveiðar og því næst tekur við kolmunna veiði.

Hoffell verður í heimahöfn á Fáskrúðsfirði um kl. 01:00 í nótt.

BÓA

Ljósafell

Ljósafell landaði um 60 tonnum á föstudaginn, en skipti síðan um veiðarfæri og nú byrjað í árlegu Haustralli fyrir Hafrannsóknarstofnun. Teknar verða 179 togstöðvar á grunnslóð á næstu vikum hringinn í kringum landið.