Jólakveðja

Óskum starfsmönnum okkar og viðskiptavinum gleðilegra jóla og farsældar á komandi ári. Kærar þakkir fyrir ánægjuleg samskipti á árinu sem er að líða.


Kaupfélag Fáskrúðsfirðinga og Loðnuvinnslan h/f

Glettingur

Glettingur, tímarit um austfirsk málefni, 14. árg. 3. tbl. 2004 er kominn út. Ritstjóri Glettings að þessu sinni er Magnús Stefánsson frá Berunesi.

Meðal efnis í blaðinu er viðtal sem Magnús átti við Gísla Jónatansson um 70 ára starfsemi Kaupfélags Fáskrúðsfirðinga. Viðtalinu fylgja myndir frá ýmsum tímum í sögu félagsins.

Þá er m.a. athyglisverð grein í blaðinu er nefnist “Franski spítalinn á Fáskrúðsfirði 100 ára”, sem Albert Eiríksson skrifar.

Glettingur er til sölu í Sparkaupum, Fáskrúðsfirði.

Kolmunni

Bergur VE 44 landaði í nótt um 500 tonnum af kolmunna hjá LVF.

Kolmunni

Bergur VE 44 er að landa um 300 tonnum af kolmunna hjá LVF, en skipið kom inn til Fáskrúðsfjarðar vegna brælu.

Fulltrúafundur KFFB

Fulltrúafundur KFFB verður haldinn á Hótel Bjargi fimmtudaginn 9. desember 2004 kl. 18.00.

Fundarefni: Fækkun félagsdeilda, endurmat stofnsjóðs félagsmanna og önnur mál.

Kvöldverður á hótelinu að loknum fundi.

Kolmunnalöndun

Bergur VE 44 landaði í gær hjá LVF 865 tonnum af kolmunna. Aflinn fékkst í færeysku lögsögunni.

Bergur landar

Bergur VE 44 landaði um 260 tonnum af kolmunna hjá LVF í gær, en skipið kom inn vegna smávægilegrar bilunar. Treg kolmunnaveiði hefur verið að undanförnu bæði í íslensku og færeysku lögsögunni.

Uppgjör LVF 1/1-30/9 2004

Tap varð af rekstri Loðnuvinnslunnar h/f fyrstu 9 mánuði ársins 2004 að fjárhæð kr. 52 millj. eftir skatta samanborið við kr. 74 millj. hagnað á sama tímabili 2003.

Rekstrartekjur félagsins voru kr. 1.702 millj. og drógust saman um kr. 324 millj. eða um 16% miðað við árið á undan, en rekstrargjöld lækkuðu um 7%. Hagnaður fyrir afskriftir og fjármagnsliði (EBITDA) nam kr. 127 millj. samanborið við kr. 331 millj. árið áður. Veltufé frá rekstri var kr. 83 millj. en var kr. 277 millj. á 9 mánuðunum 2003. Afskriftir voru kr. 164 millj. og höfðu lækkað um kr. 44 millj. Fjármagnsliðir voru nú neikvæðir um kr. 25 millj. samanborið kr. 36 millj. árið 2003.

Félagið fjárfesti fyrir kr. 305 millj. fyrstu 9 mánuðina og er þar m.a. um að ræða loðnukvóta, fiskvinnslubúnað og ný tæki í fiskimjölsverksmiðju og flokkunarstöð fyrir uppsjávarfisk.

Eigið fé félagsins var í lok tímabilsins kr. 1.384 millj., sem er 47% af niðurstöðu efnahagsreiknings. Nettó skuldir voru kr. 1.184 millj. og hækkuðu um kr. 141 millj. á tímabilinu.

Þriðji ársfjórðungur varð félaginu mjög óhagstæður m.a. annars vegna þess að lítið veiddist af kolmunna í ágúst og september, verð á fiskimjöli fór lækkandi vegna mikils framboðs á sama tíma og olíuverð hækkaði stöðugt á heimsmarkaði. Þá hefur afkoma í freðfiskframleiðslu verið slök á árinu og gengisþróun óhagstæð.

Afkoma félagsins á síðasta ársfjórðungi ræðst einkum af veiðum og vinnslu á síld.



Sjá milliuppgjör undir ársskýrslur.

Víkingur landar hjá LVF

Víkingur AK 100 er að landa um 100 tonnum af síld hjá LVF sem skipið fékk í Berufjarðarál. Nú er bræla á síldarmiðunum.

16000 tunnur hjá LVF

Það hefur verið mikið að gera í síldinni hjá Loðnuvinnslunni h/f á Fáskrúðsfirði undanfarnar vikur. LVF hefur tekið á móti 3600 tonnum af síld sem nánast öll hefur farið í söltun. Búið er að salta í 16000 tunnur á fjórum vikum, sem skiptist þannig að 13000 tunnur hafa verið saltaðar af flökum og 3000 tunnur af heilli síld, sem flökuð verður eftir áramót. Þegar er búið að afskipa 5600 tunnum af flökum og 800 tunnur fara í næstu viku. Síldin hefur verið flutt út til Svíþjóðar, Danmerkur og Bandaríkjanna. Það hefur því verið mikið álag á starfsfólki LVF, sem unnið hefur á vöktum allan sólarhringinn. Það var því ákveðið að stoppa Hoffell yfir helgina, til þess að fólk geti gert sér örlítinn dagamun. Og í kvöld ætlar 90 manna hópur frá LVF að bregða sér til Neskaupstaðar til þess að taka þátt í Rokkveislu Brján og Egilsbúðar “Glímt við þjóðveginn”, borða góðan mat og dansa fram á nótt.

Kolmunnalöndun

Bergur VE 44 kom til Fáskrúðsfjarðar í morgun með um 1200 tonn af kolmunna.

Víkingur landar hjá LVF

Víkingur AK 100 landaði 27. okt. 321 tonni af síld. Síldin var frekar smá og fór því hluti hennar í bræðslu.